Алт тушаалт 81 хувь буурсан гэх шалтгаанаар алтны татварыг 2,5 хувь болгож батална

Ашигт малтмалын тухай хуульд нэмэлт, өөрчлөлт оруулах тухай хуулийн төслийг өнгөрсөн долоо хоногт эцсийн хэлэлцүүлэгт шилжүүлсэн.  Эдийн засгийн байнгын хороо уг хуулийн төслийн анхны хэлэлцүүлгийг хийх үеэр УИХ-ын нэр бүхий  гишүүдийн алтанд ногдох ашигт малтмалын нөөц ашигласны/АМАНТ/ төлбөр таван хувь, Ашигт малтмалын тухай хуулийн 47.5 дахь хэсэгт заасан АМНАТ-ийн алтанд ногдох хувь хэмжээ тэг байх санал гаргасныг хуралдаанд оролцсон гишүүдийн олонх дэмжжээ. Үүнийг УИХ-ын чуулганаар ч дэмжсэн юм. Өөрөөр хэлбэл, алтны татвар ердөө 2,5 хувь болж өсөн нэмэгдэх татвар төлөхгүй гэсэн үг. 

Ингэснээр хуулийн төслийн дээрх заалтыг Засгийн газарт буцааж, хувь хүн, бичил уурхай, баяжуулах, боловсруулах үйлдвэр эрхлэгчид татвар төлөхтэй холбоотойг нь үргэлжлүүлэн хэлэлцэхээр болжээ. Эцсийн хэлэлцүүлгийг энэ долоо хоногийн УИХ-ын чуулганаар хэлэлцэх юм.

Ашигт малтмалын тухай хуулийн хугацаа/хэрэгжих хугацаа нь таван жил/ 2019 он гарсаар дууссан учир  өмнөх буюу 1990 хэдэн онд батлагдсан хуулийн зохицуулалтаар явж эхэлсэн билээ. Ингэснээр алтны татвар таван хувиар бодогдож байгаа юм.

Харин энэ нь Монгол банкин дахь алт туушаалтыг 81 хувиар бууруулсан хэмээн хууль санаачлагч Засгийн газар, УУХҮ-ийн сайд нь онцолж буй.

Гэвч алт тушаалт буурсан нь дан ганц татвартай холбоотой асуудал биш, дотооддоо алтны урсгалд бүрэн хяналт тавих тогтолцоог бүрдүүлэх, хил гаалийг орчин үеийн тоног төхөөрөмжөөр тоноглох зэрэг ажлууд хангалтгүй байгаатай холбоотой хэмээн УИХ-ын зарим гишүүд үзэж байгаа юм.