АНУ-ын нэр хүндтэй их сургуулиудад оюутан элсүүлэхэд авлига авдаг байжээ
АНУ-ын их дээд сургуулиуд, коллежууд чанар стандарт, сургалтын хөтөлбөрөөрөө дэлхийд тэргүүлэх байр сууринд бичигддэг. Холбооны эрх баригчид эдгээр нэр хүндтэй, томоохон сургуулиудад зуучилж их хэмжээний авлига авсан хэрэгт холбоотой 50 орчим алдартныг буруутгаад байна.
Нэр алдартай жүжигчид, дасгалжуулагч, телевизийн одод зэрэг олны танил эрхмүүд Иель, Стэнфорд зэрэг шилдэг сургуулиудад оюутан элсүүлэхдээ их хэмжээний авилга авч, өгдөг байсан гэх хэрэгт холбогдоод байгаа юм. Тухайлбал жүжигчин Фэличити Хафмэн, Лори Лафлин нарыг холбооны шүүхийн өмнө буруутгагдлаа.
Чинээлэг эцэг эхчүүд хүүхдүүдээ алдартай коллеж, нэр хүндтэй их сургуульд оруулахын тулд дасгалжуулагчдад хахууль өгч хуурамч шалгалтын материал бүрдүүлэн элсэхэд нь тусалдаг байжээ. Ийнхүү чадваргүй оюутнуудыг хууль бус аргаар элсүүлснээр жинхэнэ авьяас чадвартай оюутнууд хөтөлбөрт хамрагдаж чаддаггүй байна.
Edge College & Career Network компанийн захирал 58 настай Уильям Рик Сингер их дээд сургуульд зуучлахдаа хүүхэд нэг бүрийн эцэг эхээс 100,000-2,5 сая ам.доллар хүртэл мөнгө авдаг байжээ. Тэрээр холбооны шүүхэд мэдүүлэг өгөхдөө “Би дасгалжуулагч, сургагч багш нарыг хахуульдаж, худалдаж авч байсан” хэмээн хэргээ хүлээн зөвшөөрчээ.
Лос Анжелес дахь холбооны шүүхийн танхимд хэрэгтний суудалд сууж буй хүмүүсийн дунд “Desperate Housewives” телевизийн цувралаараа алдартай Феличити Хафмэнаас гадна түүний нөхөр жүжигчин Уильям Мэси, Лафлины нөхөр загвар зохион бүтээгч Моссимо Гианулли нар байсан юм.
Эцэг эхийнхээ буруугаас болж хууль бусаар элсэн орсон оюутан сурагчдыг шүүхэд буруутгаагүй байна. Иелийн их сургуулийн дасгалжуулагч байсан Рудольф 24 жилийн турш эмэгтэйчүүдийн хөлбөмбөгийн багийг дасгалжуулах хугацаандаа Сингерээс 400,000 ам.долларын авилга авчээ.
Америкийн томоохон их дээд сургууль, коллежууд холбооны прокуроруудтай хамтран хэргийг үргэлжүүлэн шалгаж байна. Прокуроруудын мэдэгдсэнээр 2011 оноос хойш Техасын их сургууль, Жоржтауны их сургууль, Вэйк Форест их сургууль, Калифорнийн их сургуулиудад ийм аргаар оюутнууд элсүүлж эхэлжээ.
Эх сурвалж: www.reuters.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.