Гар утасны апп ашиглан сонсголоо шалгаарай

НҮБ дахь Дэлхийн эрүүл мэндийн байгууллага, Олон улсын харилцаа холбооны газрын анхааруулснаар дэлхийн нийт залуу хүмүүсийн тал нь чанга дуу чимээнээс үүдэлтэйгээр сонсголоо алдах эрсдэлтэй байна гэсэн дүгнэлт гаргасан. Өнөөдөр Дэлхийн сонсгол хамгаалах өдөр тохиож буй юм. 

Өнгөрсөн оны судалгаагаар дэлхий нийтэд 466 сая хүн сонсголын бууралттай байна гэжээ. Хэрэв ямар нэгэн арга хэмжээ авахгүй бол 2030 он гэхэд ойролцоогоор 630 сая, 2050 он гэхэд энэ тоон үзүүлэлт өсөж 900 сая хүн сонсголын бууралттай болох боломжтой хэмээн тооцоолсон. ДЭМБ-аас энэ өдөр "СОНСГОЛОО ШАЛГУУЛЦГААЯ" уриан дор нэгдэн ажиллахыг уриалж байгаа юм. 
Та гар утасныхаа "play store"-с Дэлхийн Эрүүл Мэндийн Байгууллагаас гаргасан "HearWHO" App-ыг татан өөрийн сонсголоо шалгаарай.

Сонирхуулахад, 12-35 насны 1.1 тэрбум хүн ухаалаг утас мэтийн зөөврийн жижиг хөгжим тоглуулагчаар урт хугацаанд хөгжим сонсдогоос үүдэн дүлий болох магадлалтай гэж Дэлхийн эрүүл мэндийн байгууллагаас мэдээлж байна.

Агентлагийн анхааруулснаар залуус шөнийн клубт чанга хөгжим сонсдог тухай дурдсан. Тиймээс чөлөөт цагаараа сонсч байгаа хөгжмөө долоо хоногт 40 хүртэл цаг 80 децибелээс хэтрүүлэхгүйгээр сонсох нь аюулгүй гэж тогтоосон байна. 80 децибелийн чимээ нь метро буюу газар доорх галт тэргэнд сонсогддог дуутай ижил түвшний чимээтэй ойролцоо байдаг юм. 

Энэ тухай Дэлхийн эрүүл мэндийн байгууллагын Ерөнхий нарийн бичгийн дарга Тедрос Аданом Гебреисус "Залуу хүмүүс сонсголоо нэг л алдвал дахиж сэргээж хэвэнд нь оруулах боломжгүй байдгийг ойлгож мэдэх шаардлагатай" гэж хэлжээ.