Ким Жон Ун, Дональд Трамп нарын уулзалтыг 3,500 сэтгүүлч сурвалжилна

Америкийн Ерөнхийлөгч Дональд Трамп, Умард Солонгосын удирдагч Ким Жон Ун нарын хоёр дахь уулзалт ирэх долоо хоногт Вьетнам улсад болох гэж байна. Энэ удаагийн уулзалтыг Вьетнамын болоод гадны улс орнуудаас ирсэн 3,500 сэтгүүлч сурвалжлах эрхийн мандатаа авчээ.

Тусгай эрхтэй сэтгүүлч, сурвалжлагчид энэ сарын 16-21-ний өдрүүдэд мандатаа хүлээж авсан гэж ТАСС агентлаг дамжууллаа. Олон улсын хэвлэл мэдээллийн ажилтнууд дунд хамгийн олон эрх авсан нь АНУ бөгөөд дараа нь Солонгос, Японы сурвалжлагчид багтаж байна.

Зөвлөлт Вьетнамын нөхөрлөлийн ордонд олон улсын хэвлэл мэдээллийн багийн ажилтнууд байрлана. Трамп, Ун нарын ээлжит дээд хэмжээний уулзалт 27-28-ны өдрүүдэд болох тул хэвлэлийн төвийг хоёрдугаар сарын 26-ны өдрөөс гуравдугаар сарын нэгний өдөр хүртэл ажиллуулна.

Зөвлөлт Вьетнамын нөхөрлөлийн ордон Зөвлөлтийн үйлдвэрчний эвлэлүүдийн Вьетнамын Засгийн газарт өгсөн бэлэг бөгөөд барилгын ажил нь 1978-1985 оны хооронд явагджээ. Хурлын гол танхим 1111 хүний суудалтай, 20 гаруй жижиг өрөө танхимтай.

Уг ордныг баригдаж дууссанаас хойш олон улсын шинж чанартай үйл ажиллагаа, арга хэмжээ, хурал чуулганыг тасралтгүй зохион байгуулж иржээ.

Эх сурвалж: www.tass.com