Үнсэлцэж буй усан цэрэг 95 насандаа таалал төгсжээ

Дэлхийн хоёрдугаар дайн дууссан баярт мэдээг сонсоод сувилагч бүсгүйг үнсэж буй Америк усан цэргийн зураг дэлхийд алдартай.

Нью-Йоркийн Таймс Скүэрт 1945 оны наймдугаар сарын 14-ний өдөр авсан түүхэн гэрэл зурган дээр сувилагч бүсгүйг үнсэж буй усан цэрэг өнгөрсөн ням гарагт 95 насандаа өвчний улмаас таалал төгссөн болохыг мэдээлжээ.

Жорж Мендонса дэлхийн хоёрдугаар дайн Японы ялагдлаар өндөрлөсөн тухай мэдээг сонсож баярлахдаа шархадсан цэргүүдэд хамгийн их тусалдаг сувилагч бүсгүйг барьж авч үнссэн түүхтэй.

Тэд урьд нь бие биенээ огт харж байгаагүй бөгөөд дайнд ялсан баярт мэдээг сонссон хүн бүр нэгнээ тэвэрч, үнсэж байжээ.

Усан цэрэг зураг авахуулах үедээ 22 настай цэл залуугаараа байсан бөгөөд 1960-аад он хүртэл ингэж зураг авахуулснаа огт хараагүй байсан гэж гэр бүлийнхэндээ ярьжээ.

Альфред Айзенштадт дайн дуусах үед иргэд хэрхэн баярлан хүлээж авч буйг гэрэл зургийн хальсанд буулган “Life” сэтгүүлд дөрвөн зураг өгсөн байдгийн нэг нь энэ ажээ

Усан цэрэгт үнсүүлж буй эмэгтэй Грета Зиммер Фрийдмэн болохыг олон жилийн дараа мэдсэн.

Фрийдмэн хатагтай дайны үед шүдний эмчийн туслахаар ажиллаж, зурган дээр 21 настай бүсгүй байжээ. Тэрээр 2016 онд 92 насандаа таалал төгссөн юм.

Харин зурагчин Айзенштадт 1995 онд 96 насандаа мөнх бусыг үзүүлжээ.

Зургийг анх “Үнсэлцэж буй усан цэрэг” гэж нэрлэдэг байсан ч хожим “Үнсэлт” нэрээрээ илүү алдаршсан юм.

Сувилагч бүсгүй “зурган дээр харагдаж байгаа шиг романтик, удаан үнсэлт байгаагүй ердөө баярласан сэтгэлийн илэрхийлэл байсан” гэж хэлсэн байдаг.

Шүүмжлэгчдийн зүгээс танихгүй эрэгтэй хүч хэрэглэсэн бэлгийн хүчирхийллийн шинж чанартай зураг олон нийтэд тараасан хэмээн шүүмжилж байжээ.

Эх сурвалж: www.bbc.com, www.cnn.com