Хотын даргад С.Мөнхчулуун дахин ялбал У.Хүрэлсүх батламжлахаас өөр сонголтгүй

Өнгөрсөн долоо хоногийн сүүлээр Монгол Улсын Ерөнхий сайд У.Хүрэлсүх сар гаруйн өмнө болсон НИТХ-аас хотын даргад сонгогдоод байсан С.Мөнхчулууныг хотын даргад батламжлахгүй гэдгээ албан ёсоор мэдэгдсэн билээ.

Ингэснээр хотын даргад хэнийг нэр дэвшүүлэх вэ гэдэг асуудал дахин яригдаж эхлээд байна.

Ерөнхий сайд нэгэнт хотын даргыг батламжлахаас татгалзсан учир одоо НИТХ болон МАН-ын Удирдах зөвлөл дахин хуралдаж, хотын даргад нэр дэвшигчийг тодруулах юм.

Энэ асуудалтай зэрэгцээд өмнөх сунгааны түрүү, НИТХ-ын тэргүүлэгч С.Мөнхчулуун дахин нэр дэвшинэ гэдгээ илэрхийлжээ.

Үүний сацуу одоогийн хотын дөрвөн орлогчийн нэг Д.Энхтөрийн нэр яригдаж эхэлжээ. Одоо Нийслэлийн ядуурлыг бууруулах, хөдөлмөр эрхлэлтийг дэмжих төсөл хариуцсан орлогийн ажилтай тэрээр 2008 оноос нийслэлийн МАН-ын хорооны дэд ажиллаж байгаа аж. Мөн одоогийн НИТХ-ын дарга С.Амарсайхан ч өрсөлдөх нь тодорхой юм. 

Ингээд хотын даргын сунгаа дахин явагдаж, шинээр сонгогдсон нэр дэвшигчийг Ерөнхий сайд ажлын тав хоногт багтаан батламжлах хуулийн заалттай.  Өөрөөр хэлбэл, “сая унасан” С.Мөнхчулуун дахин сонгогдвол Ерөнхий сайд үг дуугүй түүнийг хотын даргад батламжлах ёстой гэсэн үг. Харин хотын даргын дахин сунгааг 15 хоногт багтаан зарлах хуулийн зохицуулалт бий бөгөөд НИТХ -ын дарга хэзээ зарлах нь одоогоор тодорхой болооогүй байна. Юутай ч  хоёр сар гаруй хотын даргагүй “амьдарч” буй Улаанбаатар тун удахгүй хотын даргатай болж, биднийг удирдах эрхэм тун удахгүй тодрох биз ээ.