Хатан хааны гэр бүлийн шинэ гишүүн британи аялгатай болсон уу?

Америкт төрсөн Холливудын жүжигчин байсан Мегэн Мэркл урлагийн замнал, супер одын амьдралаас татгалзаж Их Британи Умард Ирландын нэгдсэн вант улсын хатан хааны гэр бүлд шинээр орж ирсэн билээ. Одоо бие давхар Сассексын гүнгийн авхай Меган өнгөрсөн оны тавдугаар сард хунтайж Харритай гэр бүл болсноор дээдсийн зиндаанд хөл тавьсан.

Меган Мэрклийг тойрсон сонин хачин мэдээлэл тасралтгүй цацагдаж байгаа ч түүний англи хэлний аялга өөрчлөгдөх болсныг зарим хэвлэлүүд онцолжээ. Цэвэр америк аялгатай Сассексын гүнгийн авхай Британийн хааны ордонд орж ирсэн цагаас хойш олон нийтийн өмнө хэлсэн үг, зарим яриануудаас энэ нь анзаарагдах болсон байна.

Түүний авиазүй, авиа дуудлага нь британиа англи хэлэнд уусч өөрчлөгдөж байгааг анзаарчээ. Авиазүй судлаач доктор Жеоф Линдсейгийн тайлбарласнаар Меган Мэрклийн бүх өгүүлбэрт биш ч зарим үгэнд британи аялга шингэжээ.

Мөн Торонтогийн их сургуулийн хэлшинжээч профессор Мариса Брүк гүнгийн авхай британичуудын шүүмжлэлээс зайлсхийх хамгийн зөв арга бол тэдэнтэй адил ярьж сурах гэсэн байна. “Меган Мэрклийн америк англи хэлний аялга өөрчлөгдөж байгаа нь маш тод анзаарагдах болсон. Тухайлбал “баярлалаа” гэж хэлэхийн тулд “I do appreciate that” гэж илэрхийлэх болсон нь үүний нэг илрэл” гэж профессор Брүк тайлбарлажээ.

Гэхдээ энэ бол тийм ч том асуудал биш гэж мэргэжилтнүүд үзэж байна. Хүмүүс байгаа орчиндоо уусч усыг нь уувал ёсыг нь дагах бол хэвийн үзэгдэл. “Таны хэл ярианы аялга өөрчлөгдөж, хувцсаа сольсон ч та хэвээрээ л үлднэ шүү дээ” гэж Рийдингийн их сургуулийн профессор Жэйн Сэттер ярьсан байна.

Эх сурвалж: www.bbc.com