МУГЖ, дуучин Ж.Алтанцэцэг шинэ уран бүтээлээрээ мэндчилж байна

Хамгийн сүүлийн уран бүтээлийн тайлан тоглолтоо 2013 онд хийсэн МУГЖ, Поп дива дуучин Ж.Алтанцэцэг гуравдугаар сарын наймны өдөр шүтэн бишрэгчидтэйгээ шинэ тоглолтоороо эргэн уулзах гэж байгаа билээ. Сүүлийн хоёр жил гэр бүлийн хамт АНУ-д амьдарч байгаад ирсэн авьяаслаг дуучин маань цоо шинэхэн уран бүтээлээрээ үзэгч фэнүүддээ БЭЛЭГ барьжээ.

Дуучин Ж.Алтанцэцэгийн ирэх сарын наймны өдөр тоглогдох "Хайр гэж..." шинэлэг амьд тоглолтын ерөнхий зохион байгуулалтыг Монголдоо №1 "On’n Off" продакшн зохион байгуулна. Тоглолтын ерөнхий найруулагч СГЗ Н.Ононбат “Тоглолт дуурь, поп, ардын дуу гэсэн гурван хэсэгтэй болно. Энэ нь дуучин Ж.Алтанцэцэгийн олон төрөл жанраар уран бүтээлээ туурвидаг, хосгүй авьяастайг илтгэдэг” гэжээ.

“Чингисийн хүүхдүүд” УСК-ны продюсерээр уригдан АНУ-д ажиллаж байгаад эх орондоо ирсэн Поп дивагийн  тоглолт үргэлж шинэлэг болдог байсан талаар түүний байнгын үзэгчид одоо ч дурсдаг. 2000 онд Улсын циркт тоглосон “Одиссей” тоглолтод хиймэл нуур үүсгэн, завьтай дуулж, үзэгчдийг алмайруулж байсан нь одоо ч дахин давтагдаагүй байгаа аж. 2013 оны “Алтанцэцэг” тоглолтоо Монголд анх удаа 3D тайзан дээр хийж байсан нь тухайн үедээ төдийгүй одоо ч шинэлэг байх биз ээ.