Дэлхийн 3.8 тэрбум хүний хөрөнгийг 20 гаруй тэрбумтан эзэмшдэг

Удахгүй Швейцарийн Давос хотод болох Дэлхийн эдийн засгийн чуулганы өмнөхөн “Oxfam International” байгууллагаас тэрбумтнуудын тухай шинэчилсэн мэдээг танилцуулжээ. Дэлхий даяар амьдарч байгаа 2,208 тэрбумтны хөрөнгө өдөрт 2,5 тэрбум ам.доллараар өсч байгаа гэжээ.

Дэлхийн хамгийн чинээлэг 26 хүний ашиг орлого 1,4 их наяд ам.доллараар үнэлэгдэж байна. Энэ нь дэлхийн долоон тэрбум гаруй хүн амын тэн хагас нь болох 3,8 тэрбум хүний ашиг орлоготой тэнцэж байгаа юм. Хүн амын дунд баян ядуугийн ялгаа ихэссэний илэрхийлэл гэж эдийн засгийн шинжээчид үзэж байна.

Дэлхийн тэрбумтнуудын ихэнх нь АНУ-д амьдарч байгааг Форбес сэтгүүл нийтэлсэн. Амазоны гүйцэтгэх захирал Жеф Безос, Микрософтын үүсгэн байгуулагч Билл Гэйтс, Беркшир Хэтэвэйн Уоррен Бафет, Фэйсбүкийн захирал Марк Зукербэрг нарын хөрөнгө нийлээд 357 тэрбум ам.долларт хүрэх ажээ.

“Oxfam International”-ийн зөвлөж байгаагаар улс орнууд татварыг бодит байдалд үндэслэн шударга тогтоох хэрэгтэй. Мөн олон улсын хэмжээнд эрүүл мэндийн салбарын тусламж үйлчилгээ, боловсрол, олон нийтийн үйлчилгээг үнэ төлбөргүй болгож, охид эмэгтэйчүүдийг дэмжихийг зөвлөжээ.

Нэн ялангуяа төлбөргүйгээр олон цагийг зарцуулдаг гэрийн ажлаас эмэгтэйчүүдийг чөлөөлж хүүхдийн асаргаа, тог цахилгаан, ус дулаан зэрэг олон нийтийн үйлчилгээний салбарт хөрөнгө оруулахыг уриалсан юм.

Эх сурвалж: www.cnn.com