УИХ-ын Хууль зүйн байнгын хороо дөнгөж сая хаалттай горимоор хуралдаж дууслаа.

Тус байнгын хорооны дарга Ш.Раднаасэдээс дараах тодруулга мэдээллийг авлаа.

Ш.Раднаасэд: Хууль зүйн байнгын хорооны хуралдаан дөнгөж сая хаалттай хуралдаж дууслаа. Ерөнхий прокурорын саналыг сонслоо. "Халдашгүй байдлын дэд хорооноос гаргасан шийдвэр зүйтэй байна" гэж үзлээ.

- Прокурор шалгах ажиллагаанд гишүүдийн бүрэн эрх саад болоод байна гэж үзээд байгаа. УИХ гишүүдээ хамгаалж үлдэж байна уу?

- Шалгах ажиллагаа үргэлжилж байна. Дуусаагүй байна. Бүх ажлын үр дүн гарсны дараа ярих байх. Тухайн компани болон ЖДҮХС-тай холбоотой мэдээлэл, уг хэрэгт УИХ-ын гишүүн орж нөлөөлөх боломжгүй. Шалгаж дууссаны дараа уг хэргийг дахин оруулж ирэх боломжтой гэж үзлээ.

- Дөрвөн гишүүн өөрсдөө хэзээд шалгуулах боломжтой гэж хэлсэн?

- Тэр бол тэр хүмүүсийн асуудал. Байцаалт өгөхөд бүх зүйл нээлттэй.

- Байнгын хорооны ирц хир байсан бэ?

- Байнгын хороонд 19 гишүүн байдаг. Өнөөдөр 10 гишүүн ирж хуралд оролцлоо. Таван гишүүн нь гадаадад яваа юм байна. Гурван гишүүн өвчтэй байгаа юм байна. Ирц хүрсэн гэсэн үг. 

- Гишүүдийн бүрэн эрхтэй холбоотой асуудлыг хэлэлцэх хуулийн хугацаа буюу 48 цаг өнгөрчихлөө. Та бүхэн хууль зөрчиж байгаа юм биш үү?

- Тийм. 48 цаг нь өнгөрчихлөө. Гэхдээ Халдашгүй байдлын дэд хороо хуралдаж шийдвэрээ гаргасан. Уг асуудлыг парламент хэлэлцэж эхэлсэн  учраас гайгүй байх. Одоо чуулган эхлэх гэж байна. 

---