Арилжааны банк, элчин сайдын яам, хууль шүүх, худалдан авах ажиллагааны газарт зэрэг санхүүгийн чадамжаа илтгэх зорилгоор жилд давхардсан тоогоор 1.9 сая хүн нийгмийн даатгалын шимтгэл төлөлтийн лавлагаа ашигладаг. Иргэд зөвхөн НДЕГ-аас цаасан лавлагаа авах эсвэл ТҮЦ машинаас авдаг байсан бол одоо дуртай газраасаа интернет ашиглан нийгмийн даатгалын лавлагаа авах боломжтой боллоо. Энэ  талаар бид Хөдөлмөр нийгмийн хамгааллын яамны дэргэдэх мэдээлэл технологийн төвийн захирал Г.Хүрэлбаатараас тодруулга хийлээ.

-Хэзээнээс энэхүү цахим үйлчилгээ хэрэгжиж эхэлсэн бэ?

-Нийгмийн даатгалын ерөнхий газраас 2018 оныг цахим үйлчилгээг хөгжүүлэх жил болгон ажилласан. Ажил олгогч, арилжааны банк, төрийн байгууллагуудад нийгмийн даатгалын үйлчилгээг мэдээлэл технологийн аргаар явуулах төлөвлөгөө гаргаж боловсруулсан. Түүний нэг нь нийгмийн даатгалын шимтгэлийн тодорхойлолтыг интернеттэй газраас хэвлэж авах боломжтой болсон юм.

-Иргэд энэхүү үйлчилгээг хэрхэн авах вэ?

-Энэхүү лавлагааг ndaatgal.mn сайтаас даатгуулагчид зориулсан веб ажиллаж байгаа. Энэ веб рүү иргэн хэд хэдэн аргаар нэвтрэх боломжтой. Нийгмийн даатгалын аппликейшний нэвтрэх  код мөн дан системийн аргаар нэвтрэх боломжтой. Дан системийн арга нь хэрвээ та тоон гарын үсэгтэй бол нэвтэрч болно эсвэл нэг удаагийн нэвтрэх код авч нэвтрэх эрхтэй болно.

-Нэвтрэх кодоо заавал НДЕГ-т ирж авах уу?

-Нэвтрэх кодыг НДЕГ дээр ирж авах шаардлагагүй ndaatgal сайт руу ороод и-майл хаяг эсвэл утсаараа өөрийн нэг удаагийн кодыг авах боломжтой

-Энэхүү иргэдэд зориулсан вебээс өөр ямар үйлчилгээ авах боломжтой вэ?

 -Веб сайтаас лавлагаа авахаас гадна хэд хэдэн үйлчилгээ авч болно.  2006 оноос хойш байгаа  мэдээллээ харж болно, нэрийн дансны мэдээллээ харах боломжтой, тэтгэвэртэй холбоотой бүх мэдээллийг авч болно.

-Нийгмийн даатгалын лавлагааг аваад тухайн байгууллага дээр очиход ямар нэгэн хүндрэл асуудал гарах уу?

-Манай нийгмийн даатгалын дэвтрийг шаарддаг бүх байгууллагуудад хүчинтэй. Жил 400 мянган хүн нийгмийн даатгалын лавлагааг ТҮЦ машинаас хэвлэж авсан байна. Нэг удаа авахад 1000 төгрөг байдаг бол одоо үнэгүй болж байгаа юм. Тухайн байгууллага интернетээс гаргаж авсан лавлагааг хүлээж аваад бар кодоор нь уншуулан үнэн эсэхийг шалгаж авна. Энэхүү үйлчилгээ нь иргэний цаг завыг хэмнэж буй хэрэг юм. 

Сурвалжлагч Д.Болор-Эрдэнэ

---