Эцэг Буш Филиппин хүүг нууцаар ивээн тэтгэдэг байжээ
АНУ-ын 41 дэх Ерөнхийлөгч асан Жорж Герберт Буш таалал төгсөөд удаагүй ч түүний амьд ахуйдаа хийсэн сайн үйлс үргэлжлэн түгсээр байна. Эцэг Буш хэмээн нэрлэдэг Ерөнхийлөгч агсан Филиппин хүүг 10 жилийн турш ивээн тэтгэж, нууц нэрээр захидал солилцдог байжээ.
Христийн сүмүүдээр дамжиж дорой буурай орны хүүхдүүдэд тусалдаг “Compassion International” ашгийн бус байгууллагын тусламжтайгаар Филиппиний иргэн Тимоти хүү Ерөнхийлөгч агснаас дэмжлэг авдаг байсныг олон нийтэд зарласан байна. Буш хүүгийн боловсрол, хичээлээс гадуурх сургалт, заримдаа хоол хүнсэнд нь тусалдаг байжээ.
2002 оны нэгдүгээр сарын 24-нд Буш хамгийн анхны захидлаа долоон настай Тимотид илгээжээ. Үүнд “Хүндэт Тимоти, би одоо 77 настай ахмад эр. Хүүхдүүдэд их хайртай, би чамтай огт уулзаж байгаагүй ч аль хэдий нь чамд хайртай болсон. Би Техаст амьдардаг. Амжилт хүсье G. Walker” гэж бичсэн байна.
Ерөнхийлөгч агсан 2001 онд Вашингтонд зул сарын тоглолтонд оролцож байхдаа хүүхэд ивээн тэтгэх санаа олжээ. Тимоти хүүг сонгосны дараа Ерөнхийлөгчийн аюулгүйн албанаас нэрийг нь нууцлах хүсэлт тавьж, ёсоор болгосон байна. Тэдний нэг захидалд Тимоти “Хүндэт G. Walker намайг мартаагүйд баярлалаа” гэсэн байжээ.
Тимотиг 17 нас хүрсний дараа зуучлагч байгууллагын төлөөлөгч хүүтэй уулзаж ивээн тэтгэгч нь АНУ-ын Ерөнхийлөгч байсан гэдгийг хэлжээ. Тимоти ихэд цочирдож хүлээж авч, огт энэ талаар бодож байгаагүй гэсэн байна.
Эх сурвалж: www.cnn.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.