“Галзуу баян Индонезиуд”-ын ганган үдэшлэгт зочилсон нь

Нохойны дүрстэй, өнгөлөг үдэшлэгийн урилга авлаа. Нилээд өвөрмөц санагдаж хэсэг гайхшрав. Гэхдээ энэ намайг гайхшруулах зүйлсийн дөнгөж эхлэл нь байсан юм. Зургаан нас хүрч буй бяцхан охины төрсөн өдрийн урилга авч, Индонези улсын нийслэл Жакарта хотын хамгийн үнэтэй Мэнтэнг цэцэрлэгт хүрээлэнд бүтэн өдөржин үргэлжлэх үдэшлэгт хөл тавилаа.

Цэцэрлэгт хүрээлэнг аюулгүйн албаныхан хамгаалж, ногоон ширэг, үзэсгэлэнтэй модод ширэнгэн ой мэт сэтгэгдэл төрүүлж байлаа. Үдэшлэгт ирсэн зочдыг алжаал тайлах массаж, халуун устай ваннд амрааж, дараа нь мөстэй кофегоор дайлав. Үдээс хойш дарсны үдэшлэг хүлээж байлаа. Цэцэрлэгт хүрээлэн бүхэлдээ нохойны хэлбэртээ чимэглэлээр гоёжээ.

Гэр бүлийнхэн нь кино компани хөлсөлж Холливүдын “Suicide Squad” киног дахин эвлүүлж төрсөн өдөр нь болж буй охиноо гол дүрд нь тоглуулсан байв.

Гэхдээ энэ бол Индонези улсад тийм ч ховор бас гайхшраад байх үзэгдэл биш. Индонези улсад дунджаас дээш түвшний нийгмийн давхаргад хамрагдах иргэдийн тоо нэмэгджээ. “Галзуу баян Азиуд” кино есдүгээр сард тус улсад нээлтээ хийснээс хойш Твиттер хуудсанд “галзуу баян индонезиуд”-ын түүх бичигдэх болсон байна.

Хоёр дахь том хот Сурабаяачуудын баярхал, чамирхал олон нийтийн цахим сүлжээнд трэнд болоод амжсан. Сурабаяад болсон хуриманд гадна дотны олон зуун зочин уригдаж, хуримын бэлэг Jaguar загварын автомашин байх нь нийтлэг үзэгдэл.

Ойрын 20 жилд Индонези улсад ядуу иргэдийн тоо эрс багасч, таван хүн тутмын нэг нь нийгмийн дунджаас дээгүүр түвшинд харьяалагдаж байна. Тус улсын аж ахуй эрхлэгчид байгалийн баялаг дал модны тос, нүүрс, алт, зэсээ олборлох нь нэмэгджээ.

Салимун бол чинээлэг эрхмүүдийн тансаглалыг огт ойлгодоггүй жирийн нэг иргэн. Тэр хүүхдүүдийнхээ ирээдүйн төлөө насаараа хөдөлмөрлөж, гудамж цэвэрлэдэг үйлчлэгч. Сардаа 254 ам.долларын цалин авдаг. Түүний хувьд ухаалаг гар утас, таблет цоо шинэ ертөнц хэвээр үлджээ.

Ребекка Хэншке - Жакартагаас хийсэн тэмдэглэл

Эх сурвалж: www.bbc.com