МАН-ын гишүүд ЕНБД Д.Амарбаясгаланг огцрохыг шаардлаа

МАН-ын хэсэг гишүүд өнөөдөр хэвлэлийн бага хурал хийж, сүүлийн үед намдаа үүсээд байгаа томоохон зөрчилдөөнтэй асуудлыг дотооддоо цэгцлэхийг намын удирдлагууддаа хандаж шаардлаа. Тэд цөөн эрх мэдэлтний явцуу эрх ашгаас үүдэж намын 200 мянга гаруй гишүүд нийтээрээ, цаашлаад Монголын ард түмэн хохирч болохгүйг сануулж байна. Улс төрийн өнөөгийн хүндрэлтэй нөхцөлд хүргэхэд жинтэй хувь оруулж буй зарим улс төрийн албан тушаалтнуудыг огцруулахыг МАН-ын дарга У.Хүрэлсүхээс шаардаж, шаардлагыг хүлээж аваагүй тохиолдолд Монгол Улсын Үндсэн Хууль, МАН-ын дүрмийн хүрээнд улс төрийн дараа дараагийн тэмцэл өрнүүлэхээ мэдэгдлээ.

Уг шаардлагад:

• МАН-ын Бага хурлыг яаралтай зарлан хуралдуулж, үүсээд байгаа хүндрэл бэрхшээлийн талаар дотооддоо ярьж шийдвэрлэх,
• Өнөөгийн хурцадмал байдал үүсэхэд гол нөлөө үзүүлсэн, ЖДҮ-ийн зээл, элдэв тендерт нэр холбогдсон, удаа дараагийн сонгуульд МАН-аас нэр дэвшигчийг ялагдуулсан хэрнээ өнөө хүртэл албан тушаалтайгаа зууралдаж байгаа Ерөнхий нарийн бичгийн дарга Д.Амарбаясгаланг үүрэгт ажлаас нь огцруулан хариуцлага тооцох,
• “Шударга ёс”-ыг өөрийн удирдаж буй намынхаа аппаратаас хэрэгжүүлж эхлэхийг МАН-ын дарга У.Хүрэлсүхээс шаардсан байна.

Энэхүү шаардлагыг МАН-ын дарга У.Хүрэлсүх, ЕНБД Д.Амарбаясгалан, МАН-ын Хяналтын хороонд тус тус хаяглан хүргүүлж байгаа бөгөөд хариуг 24 цагийн хугацаанд багтаан албан ёсоор мэдэгдэхийг хүслээ. 

Мөн тэд МАН-ын  жирийн гишүүдийн төлөөлөл цаашид эвлэлдэн нэгдэж “Намаа Цэгцлэх 100+ Хөдөлгөөн”-ийг үүсгэн байгуулж, намын нийт гишүүдийг намынхаа үйл ажиллагаанд идэвхтэй оролцохыг уриалж, удахгүй тохиох МАН-ын 100 жилийн ойг амжилт бүтээлээр дүүрэн угтахын төлөө зүтгэнэ гэсэн юм. 

Намаа Цэгцлэх 100+ Хөдөлгөөний ХБХ-ийн бүрэн эхээр нь шууд дамжууллаа.