Хятадын ЗГ Канадын дахин нэг иргэнийг баривчилжээ
Хоёр орны харилцаа хурцадмал үед Канад улсын Гадаад хэргийн яамнаас Хятадад байгаа иргэнтэйгээ холбоо тасарсан гэдгийг мэдэгдлээ. Гадаад хэргийн яамны үзэж байгаагаар Хятадын эрх баригчид Канадын хоёр дахь иргэнийг баривчлан саатуулжээ.
Канад улсын иргэн бизнес эрхлэгч Майкл Спавор энэ долоо хоногт яамны ажилтнуудтай холбогдож байцаагдаж байгаа гэдгээ мэдэгдсэн байна. Тэрээр Умард Солонгосын хилийн ойролцоо Хятадын Дандон хотод бизнес хийдэг ба Пхеньяны Засгийн газартай ойрын холбоотой ажилладаг.
Хятадын төрийн мэдлийн телевизээр өнөөдөр өглөө ноён Спавор нь үндэсний аюулгүй байдалд аюул учруулсан хэрэгт буруутгагдан байцаагдаж байгаа тухай мэдээлсний дараахан холбоо тасарчээ. Канад улс Спаворын байгаа газрыг тогтоохоор шаргуу ажиллаж байна.
Хятадад баривчлагдсан гэж үзээд байгаа уг эрхэм “Паекту соёлын солилцоо” нэртэй байгууллага удирдаж, Умард Солонгос руу бизнес, соёлын аялал зохион байгуулдаг байна. NBA-ын од сагсан бөмбөгчин Деннис Родманыг 2013 онд Умард Солонгост айлчлахад хамгийн их тусалсан хүн юм.
Энэ долоо хоногийн эхэнд Ванкуверээс Гадаад хэргийн яамны дипломатч асан, олон улсын бодлого судалгааны газрын зөвлөх Майкл Ковриг Хятадад баригдсан тухай мэдээлж байсан. Хятадын Засгийн газар уг мэдээллийг баталсан ч Канадын зүгээс иргэнийхээ аюулгүй байдал, эрүүл мэндэд зовниж байгаагаа илэрхийлсэн.
Канад улс Хятадын “Huawei” технологийн компанийн гүйцэтгэх захирал Мэн Ванжоуг баривчилж, батлан даалтанд сулласны дараа Канадын иргэд дарааллан баригдаад байна.
Эх сурвалж: www.bbc.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.