Адидас компани дөрвөн зураастай хувцас худалдсан Австралийн компанийг шүүхэд өгчээ
Спортын хувцас үйлдвэрлэгч Адидас компани Австралийн White Fox Boutique брэндийг "барааны тэмдэгт зөрчсөн" хэмээн тус улсын Холбооны шүүхэд өглөө.
White Fox компани 2026 оны нэгдүгээр сард худалдаанд гаргасан юүдэнтэй цамц, өмд, шорт зэрэг хувцаснууддаа дөрвөн зэрэгцээ зураас ашигласан нь Адидас брэндийн алдарт гурван зураастай төөрөгдүүлэн андуурахаар ижил төстэй болсон гэж нэхэмжлэлд дурджээ.
Адидас компани өөрийн бэлгэ тэмдэг болсон гурван зураасыг 1952 онд дэлхий даяар, 1973 онд Австралид барааны тэмдэг болгон бүртгүүлж, хуулийн хамгаалалт авсан түүхтэй юм байна. Тэгвэл White Fox брэнд Сидней хотын нийтийн тээврийн хэрэгслүүд болон Лос-Анжелес, Лондон зэрэг хотуудад түгээсэн зар сурталчилгаагаараа хэрэглэгчдийг төөрөгдүүлж, Адидастай холбоотой мэт сэтгэгдэл төрүүлсэн хэмээн буруутгагдаж байна.
Түүнчлэн тус брэнд сурталчилгааны зураг авалтдаа Адидасын пүүзийг хувцастайгаа хослуулан хэрэглэж, улмаар маргаанаас зайлсхийхийн тулд нэг зураасыг нь цахим аргаар арилгасан болохыг Адидасын төлөөлөгчид 2026 оны дөрөв болон зургаадугаар сарын хооронд нотлох баримтаар цуглуулжээ.
Адидас компани 2026 оны гуравдугаар сарын 19-нд дөрвөн зураастай бүтээгдэхүүнийхээ худалдааг бүрэн зогсоох шаардлагыг White Fox-д албан ёсоор хүргүүлсэн боловч тус компани биелүүлээгүй байна. Иймээс есдүгээр сарын сүүлээр Австралийн Холбооны шүүхэд албан ёсны нэхэмжлэл гаргасан бөгөөд аравдугаар сарын 1-нд нэмэлт баримтуудыг бүрдүүлж өгчээ. Нэхэмжлэгч тал дөрвөн зураастай загваруудын худалдааг бүрмөсөн хориглох, хууль бусаар олсон бүх ашгийг гаргуулах болон хохирлыг нөхөн төлүүлэх шаардлага тавьжээ.
Жоржиа болон Даниэль Контос нарын 2013 онд Сидней хотод үүсгэн байгуулсан цахим худалдааны White Fox брэнд нь 2025 оны санхүүгийн жилд Австрали болон АНУ-ын зах зээлээс 542 сая австрали долларын орлого төвлөрүүлсэн томоохон бизнес юм. Тус брэнд зах зээлд өөрийн байр суурийг эзлэхийн тулд зөвхөн маркетингийн үйл ажиллагаанд 52 сая австрали доллар зарцуулсан байдаг.
Энэхүү шүүхийн зарга нь Адидас компанийн олон жил эзэмшиж буй зэрэгцээ зураасны онцгой эрхийн хүрээ хязгаарыг Австралийн хууль зүйн орчинд дахин сорьсон хэрэг болж байна.
Адидас өмнө нь 2013 онд Pacific Brands компанийн дөрвөн зураастай гутлын эсрэг зарга үүсгэж ялалт байгуулж байсан бол Thom Browne брэндтэй хийсэн олон улсын маргаанд ялагдал хүлээж байсан юм.
Хэргийн урьдчилсан хэлэлцүүлэг 2026 оны аравдугаар сарын 9-нд болохоор товлогдсон бөгөөд загварын ертөнц дэх оюуны өмчийн хамгаалалтад чухал нөлөө үзүүлэхээр байна.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.