ВИДЕО: Страсбург хотод гурван хүний аминд хүрсэн сэжигтнийг мөшгиж байна

Францын Страсбург хотод зэвсэгт этгээд халдлага үйлдэж гурван хүний аминд хүрч, 12 хүнийг гэмтэж шархдуулжээ. Зул сарын баярыг угтсан үзэсгэлэн худалдаа болж байсан Клебер талбайн дэргэд халдлага үйлдсэн гэмт этгээд хэргийн газраас зугтаж, цагдаа нар эрэн сурвалжилж байна.

Орон нутгийн цагаар мягмар гарагийн орой 20 цагт буюу худалдааны газар эд ачаалалтай, хөл хөдлөгөөн ихтэй үед болсон халдлага хотын иргэдийг цочирдуулаад байна. Сэжигтэн 29 настай, тусгай хүчинд террорист халдлага төлөвлөж байж болзошгүй гэсэн бүртгэлтэй байжээ.

Сэжигтний гэр Страсбург хотын Нэудорф дүүрэгт байдаг ба гэрийнхээ ойролцоо нуугдсан байж болзошгүй тул дүүргийн оршин суугчдын гэрээсээ гаралгүй, сэрэмж болгоомжтой байхыг анхаарууллаа. Гэмт этгээд халдлагын үеэр цагдаа нартай буудалцаж шархадсан байгаа гэдгийг Францын цагдаагийн газраас мэдээлжээ. Цагдаа нар гэмт этгээдийг мөрдөх явцдаа гар бөмбөг олоод байгаа юм.

Франц улсын Дотоод хэргийн сайд Кристоф Кастанер өөрийн биеэр Страсбург хотод ирж байна. Түүний мэдээлснээр гэмтэж шархадсан 12 хүний тэн хагасынх нь биеийн байдал хүнд байна.

Халдлага болсон талбайд жил бүр зул сарын баярыг угтаж үзэсгэлэн худалдаа эрхлэн олон мянган аялагч жуулчин цугладаг. Хэргийн газарт байсан гэрчийн ярьснаар буун дуу гарсны дараа ойролцоох гүүрэн дээрээс шархадсан хүн олжээ. Түүнд туслахыг хичээсэн ч амиа алдсан байна. Мөн өөр нэг гэрчийн яриагаар эхлээд хоёр удаа буун дуу гарч дараа нь нэг дор олон удаа буудах чимээ сонсогдсон гэжээ.

Страсбург хотын дарга Роланд Райс зул сарын баярт зориулсан худалдааны газрыг лхагва гарагт хааж, хотын захиргаа төрийн далбааг хагас бөхийлгөж эмгэнэл илэрхийлнэ хэмээн мэдэгджээ.

Эх сурвалж: www.bbc.com