🔴Н.Шинэцэцэг: Миний гэм бурууг шүүж байгаа мэт уур амьсгал дунд урьдчилсан хэлэлцүүлэг өнгөрлөө

Н.Шинэцэцэг: 

-Шүүхээс хэргийг прокурорт буцаах болсон шийдвэртэй санал нийлэхгүй байна. Прокурорт буцаах болсон шалтгаанууд нь тийм ч их ач холбогдолтой, чухал зүйл сонсогдсонгүй. Энэ нь анхнаасаа мөрдөн байцаах ажиллагааг хянуур, няхуур явуулаагүйтэй холбоотой үүсэж байгаа үр дагавар гэж хэлмээр байна. 

Шүүх хуралд оролцох үед миний гэм бурууг шүүж байгаа мэт уур амьсгал дунд өнгөрлөө. Яллагдагч нарын өмгөөлөгч нар нэлээд ёс зүйгүй, бүдүүлэг байсан. Прокуророос оруулж ирсэн хэрэгт авагдсан нотлох баримтуудыг бараг бүгдийг нь үгүйсгэсэн байр сууринаас ярьцгааж байна. 

Яллагдагч талынхан "Бид нар гэм буруугүй, биднийг гүтгэж байна" гэж аль ч талаасаа хэлж зүрхлээгүй. Би тэдний өөдөөс хараагүй, харахыг ч хүсээгүй. Надад тэр хүмүүст хэлэх үг, тэдний үгийг сонсох ямар ч хүсэл байхгүй. 

Прокурорын зүгээс хэргийг нотлох баримтад үндэслэн шүүхэд шилжүүлсэнд итгэл найдвар тавьж байна. Өмгөөлөгч нартаа талархал илэрхийлмээр байна. Юугаа ч мэдэхгүй сандарч байхад манай өмгөөлөгч нар хоёр талаас далавчаараа нөмөрлөөд л аваад явчихсан. Миний энэ хэргийг шийдвэрлэхэд сэтгэлээрээ үргэлж дэмжиж, санаа тавьж байгаа Монголын сайхан сэтгэлтэй бүх ээжүүддээ баярлалаа. Та бүхний сэтгэлийн дэм маш их хүч болж байна. Би олон хүний эсрэг, олон жилийн турш ганцаараа тэмцэж ирсэн. Харин анх удаа би ганцаараа биш байна гэдгээ мэдэрлээ. Та бүхэндээ маш их баярлалаа гэв. 

Шүүх хурлын үеэр хохирогчийн өмгөөлөгчдийн зүгээс Эрүүгийн хэрэг хянан шийдвэрлэх тухай хуулийн 33.1 дүгээр зүйлийн 6.12-т заасан үндэслэлээр яллагдагч нарыг цагдан хорих санал гаргажээ.

Тус хэрэгт нийт дөрвөн хүн яллагдагчаар татагдсанаас Н.Сүхбаатар, Н.Шижирбат, С.Энхболд нар шүүх хуралд ирсэн. Б.Мөнх-Алдарын хувьд гадаадад байгаа бөгөөд яллагдагчаар татах тогтоолтойгоо танилцаагүй байгаа тул түүнд холбогдох хэргийг тусгаарлан шалгахаар болж, шүүх хуралд ирээгүй байна.