Мэн Ванжоуг 10 сая канад доллараар батлан даалтанд суллалаа
Энэ сарын нэгний өдөр Ванкувер хотод баривчлагдан саатуулагдаад байсан Хятадын “Huawei” компанийн санхүү эрхэлсэн гүйцэтгэх захирал Мэн Ванжоуг батлан даалтанд суллалаа. Гэсэн хэдий ч Мэн Ванжоу буюу Кэти Мэнийн хэргийг АНУ-ын Засгийн газарт шилжүүлж магадгүй хэвээр байна.
Даваа гарагт болсон шүүхийн шийдвэрээр хатагтай Мэнийг 10 сая канад доллар буюу 7,4 сая ам.долларын барьцаанд суллажээ. Тэрээр Канад улсын хил давах эрхгүй, шагайнд нь цахилгаан мэдрэгч суулгаж 24 цагийн турш хяналтанд байна. Дараагийн шүүх хурал ирэх оны хоёрдугаар сарын зургааны өдөр болно.
“Huawei” компанийн үүсгэн байгуулагч Рэн Зэнфэйн охин 46 настай Мэнийг Америкийн хүсэлтээр Канад улсад баривчилсан нь Хятадын эрх баригчдын бухимдлыг төрүүлж, дипломат харилцаанд сэв суух хүртэл нөхцөл байдал үүссэн.
Америкийн Ерөнхийлөгч Дональд Трамп өөрийн биеэр хэргийг нягтлан шалгана гэдгээ мэдэгдээд байгаа юм. Энэ нь худалдааны зөрчлөөс болж хэдий нь таагүй уур амьсгал үүссэн Бээжин-Вашингтоны харилцааг хурцатгахаас зайлсхийж буй үйлдэл юм.
Трамп “Энэ улсын төлөө хийж болох хамгийн сайн зүйлийг би хийнэ. Дэлхийн хамгийн том худалдааны тохиролцоог хадгалж үлдэх нь маш чухал” гэж “Reuters” агентлагт өгсөн яриандаа дурджээ.
Вашингтоны зүгээс технологийн тэргүүлэгч “Huawei” компанийн охин компани “Skycom”-ыг 2009-2014 оны хооронд Иран улсын эсрэг тавьсан хориг арга хэмжээг зөрчсөн гэж буруутгасан юм.
Эх сурвалж: www.bbc.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.