Эрдагон болон исламын шашныг доромжилсон хэргээр Туркийн комедианыг баривчилжээ
Туркийн алдартай стэнд-ап комедиан, зохиолч, 32 настай Дениз Гёкташийг Ерөнхийлөгч Режеп Тайип Эрдоган болон исламын шашныг доромжилсон хэргээр Истанбулын нисэх онгоцны буудалд баривчилжээ.
Истанбул хотын Ерөнхий прокурорын газраас түүнийг 2026 оны долоодугаар сарын 2-ны өдөр хилээр нэвтрэх үед нь саатуулсан бөгөөд тэрээр өөрийн "Ölü Deniz" (Үхсэн Дениз) нэртэй хошин шогийн тоглолтоороо дамжуулан төрийн тэргүүн болон шашны үнэт зүйлсийг гутаан доромжилсон хэрэгт буруутгагдаж байгаа юм.
Хэрэг үүсгэх гол шалтгаан нь түүний "Ölü Deniz" нэртэй 90 минутын турш үргэлжлэх бие даасан тоглолт болсон байна. Уг тоглолтыг 2026 оны зургадугаар сарын 1-нд Истанбул хотын Харбие задгай театрт зохион байгуулж, улмаар зургадугаар сарын 24-ний өдөр YouTube сувагт байршуулжээ. Богино хугацаанд цахим орчинд хүчтэй тархсан тус бичлэг ердөө долоо хоногийн дотор 8.5-9 сая орчим хандалт авч, олон нийтийн анхаарлын төвд орсон байна.
Түүний тоглолтын үеэр хэлсэн хэд хэдэн хошигнол консерватив болон засгийн газрыг дэмжигч бүлгүүдийн дургүйцлийг ихээр хүргэжээ.
Тодруулбал, Дениз Гёкташ исламын шашин болон Коран судрыг элэглэж, Ибрахимын шашны дөрвөн гол судар бичгийг ердийн уран зохиолын бүтээл хэмээн нэрлэсэн байна. Үүнээс гадна Туркийн Ерөнхийлөгч Режеп Тайип Эрдоганыг "бэргэж эмээдэг дарангуйлагчаас өөрийнхөө хэн бэ гэдгийг бүрэн хүлээн зөвшөөрсөн дарангуйлагч болон хувирсан" хэмээн хошигнож, шоронд хоригдож буй Истанбул хотын дарга Экрем Имамоглугийн улс төрийн нөхцөл байдлыг ч мөн хөнджээ.
Олон нийтийн сүлжээнд шуугиан тарьсан уг тоглолтын дараа Анкара хотын дарга асан Мелих Гёкчек, Их нэгдсэн намын дарга Мустафа Дестижи зэрэг улс төрийн нөлөө бүхий эрхмүүд комедианыг эрс шүүмжилсэн байна.
Улмаар Ерөнхийлөгчийн дэргэдэх Харилцаа холбооны төвд (CİMER) иргэдээс 185 гомдол ирсний дагуу прокурорын газраас албан ёсоор мөрдөн байцаалтын ажиллагааг эхлүүлжээ. Үүний зэрэгцээ Туркийн Мэдээлэл, харилцаа холбооны технологийн газар (BTK) олон нийтийн сүлжээ, ялангуяа Х (хуучнаар Твиттер) платформ дээрх тус тоглолтын богино хэмжээний бичлэгүүдийг үзэх эрхийг Турк улс дотор хаах шийдвэр гаргасан байна.
Турк улсын Эрүүгийн хуулийн дагуу Дениз Гёкташ хоёр үндсэн зүйл ангиар яллагдах нөхцөл бүрдээд байна.
Шашны үнэт зүйлсийг олон нийтийн өмнө доромжлон гутаасан гэх үндэслэлээр зургаан сараас нэг жил хүртэл, харин Ерөнхийлөгчийг доромжилсон гэх үндэслэлээр нэгээс дөрвөн жил хүртэл хугацаагаар хорих ял авах эрсдэлтэй юм байна. Түүнийг баривчлагдахаас өмнө эх орноосоо зугтсан гэх цуу яриа гарсан ч комедиан өөрийн цахим хуудсаараа дамжуулан төлөвлөгөөт амралтаараа явж байгаагаа тайлбарлаж, шаардлагатай бол анхны нислэгээр эргэж ирнэ гэдгээ мэдэгдсэн бөгөөд хэлсэн ёсоор Истанбулд сайн дураараа бууж ирээд баривчлагджээ.
Дениз Гёкташ 2026 оны долоодугаар сарын 3-ны өдрийн 10:30 цагт Истанбул хотын Чаглаян шүүхийн өмнө дуудагдаж, шүүгч түүнийг үргэлжлүүлэн хорих эсэхийг шийдвэрлэхээр болжээ.
Энэ үйл явдал нь Турк улс дахь үг хэлэх, үзэл бодлоо илэрхийлэх эрх чөлөө болон төрийн хяналт, шашны нөлөөллийн хоорондын зөрчлийг дахин хурцаар харуулсан хэрэг болж байна.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.