Ковидын сангаас 250 сая доллар луйвардсан гол этгээдийг Сомали улсаас баривчилжээ
АНУ-ын Миннесота мужид цар тахлын үеийн хүүхдийн хоол тэжээлийн сангаас 250 сая ам.доллар завшиж, дөрвөн жил орчим хугацаанд оргон зайлсан "Feeding Our Future" сангийн удирдах албан тушаалтан Абдикерм Абделахи Эйдлех гэгчийг Сомали улсын нийслэлээс баривчилжээ.
Холбооны мөрдөх товчоо (ХМТ) болон Сомалийн тагнуул, цагдаагийн байгууллагууд хамтран 2026 оны зургаадугаар сарын 25-ны өдөр тусгай ажиллагаа явуулж, түүнийг баривчилсан бөгөөд тэрээр тус хэргийн гол удирдагч Эми Бокийн баруун гар, хоёр дахь гол хүнээр нэрлэгдэж байсан юм.
Өдгөө 42 настай Абдикерм Абделахи Эйдлехийг 2022 оны есдүгээр сарын 13-ны өдөр анх шүүхээс яллагдагчаар татсан бөгөөд түүнд цахим луйвар хийхээр хуйвалдсан, холбооны хөтөлбөрийн авлига авсан, мөнгө угаасан зэрэг нийт 31 үндэслэлээр эрүүгийн хэрэг үүсгэсэн байна. Тэрээр сомали хэлээр ярих чадвараа ашиглан хуурамч хоолны цэгүүд бий болгон бүртгэж, ресторан болон хоол бэлтгэх газруудад хоолны тоог зохиомлоор нэмэгдүүлэх, хуурамч нэхэмжлэх гаргах зааварчилгаа өгдөг байжээ. Гэрчүүдийн мэдүүлснээр, Эйдлех гэрээг хүчин төгөлдөр мэт харагдуулахын тулд аж ахуйн нэгжүүдийг бүртгэлд оруулан, тэднээс 5 хувийн шимтгэл, эсвэл сар бүр 30 мянган ам.долларын хахууль шаардаж, хувьдаа 5 сая гаруй ам.доллар завшсан байна.
Түүнчлэн тэрээр өдөрт мянга мянган хүүхдийг хооллож байгаа мэт схем үүсгэн, бусдын нэр дээр хүүхдийн хоол тэжээлийн хэд хэдэн хуурамч төвийг байгуулсан байна. Санг нуун дарагдуулах, мөнгө угаах зорилгоор хуурамч компаниудыг байгуулж ажиллуулж байсныг хууль хяналтынхан тогтоожээ. Уг хэрэг нь АНУ-ын түүхэнд цар тахлын тусламжийн санг хамгийн их хэмжээгээр завшиж, хувьдаа тансаг зэрэглэлийн автомашин, үл хөдлөх хөрөнгө худалдан авсан томоохон луйврын нэг юм.
"Feeding Our Future" сангийн үүсгэн байгуулагч Эми Бок 2026 оны тавдугаар сард холбооны шүүхээс 42 орчим жилийн хорих ял сонссон юм. Одоогийн байдлаар тус 250 сая ам.долларын луйврын хэрэгт нийт 79 хүнийг буруутган шалгаснаас 66 нь гэм буруугаа хүлээгээд байна. Эйдлехийн баривчилгаа нь зугтаж байсан өөр нэгэн сэжигтнийг Кени улсаас буцаж ирэн ХМТ-нд бууж өгснөөс хойш хоёр долоо хоногийн дараа болсон бөгөөд энэ нь АНУ-ын хууль хяналтынхан хилийн чанадад байгаа оргодлуудыг олж тогтоох, хариуцлага хүлээлгэх ажиллагааг эрчимтэй үргэлжлүүлж байгааг харуулж байна.
Эх сурвалж:
• wral.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.