Старбакс Солонгос дахь бүх салбараа түр хааж, ажилтнууддаа түүхийн сургалт орно
Өмнөд Солонгос дахь Старбакс (Starbucks Korea) сүлжээ кофе шоп түүхэн болон нийгмийн мэдрэмжгүй маркетингийн кампанит ажлаас үүдсэн олон нийтийн эсэргүүцлийн улмаас 2026 оны зургаадугаар сарын 22-ны даваа гарагт улс даяарх бүх салбараа түр хугацаагаар хааж, ажилтнууддаа албадан сургалт явуулахаар боллоо.
Тус улсад 1999 онд анхны салбараа нээснээс хойш анх удаа хийж буй уг шийдвэрийн дагуу нисэх буудлууд дахь цөөн хэдэн цэгээс бусад 2000 гаруй салбар орон нутгийн цагаар 15:00 цагт үүд хаалгаа барих юм. Гурван цагийн турш үргэлжлэх сургалтын улмаас тус компани ойролцоогоор 2.1 тэрбум вон (1.4 сая ам.доллар)-ын борлуулалтын алдагдал хүлээнэ гэж "IGAWorks" дата судалгааны фирм тооцоолжээ.
Олон нийтийн дургүйцлийг төрүүлсэн хэрэг явдал 2026 оны тавдугаар сарын 18-нд эхэлсэн байна. Тус компани "SS Tank" нэртэй зэвэрдэггүй ган аяганы цувралдаа хямдрал зарлаж, үүнийгээ "Танкны өдөр" (Tank Day) хэмээн нэрлэсэн нь Өмнөд Солонгосын түүхийн хамгийн эмгэнэлтэй үйл явдлуудыг сануулжээ.
Тодруулбал, тавдугаар сарын 18-ны өдөр бол 1980 оны Кванжугийн ардчилсан бослогын ой бөгөөд тухайн үеийн цэргийн дарангуйлагч дэглэм жагсагчдыг дарахын тулд танк, нисдэг тэрэг ашиглан олон зуун хүний аминд хүрсэн гашуун түүхтэй юм. Үүнээс гадна сурталчилгаанд ашигласан "Ширээ рүү хүчтэй цохь!" гэх уриа нь 1987 онд цагдаа нарын эрүүдэн шүүлтээс болж амиа алдсан оюутан идэвхтэн Пак Жон Чолын хэргийг нуун дарагдуулахын тулд эрх баригчдын хэлж байсан "мөрдөгч ширээ цохиход цочирдсондоо амиа алдсан" гэх тайлбарыг санагдуулсан гэжээ.
Сурталчилгаа цацагдсаны дараа иргэд Старбаксын аяга, хэрэгслүүдийг олон нийтийн өмнө хагалан эсэргүүцлээ илэрхийлж, томоохон бойкот эхлүүлжээ. Түүнчлэн төрийн яамд тус сүлжээтэй хамтран ажиллахаа зогсоож, Өмнөд Солонгосын Ерөнхийлөгч Ли Жэ Мён өөрийн Х (хуучнаар Twitter) хуудсаараа дамжуулан уг кампанит ажлыг "хүнлэг бус, шившгийн үйлдэл" хэмээн буруушаасан байна.
Дуулианы улмаас Старбакс Солонгос салбарын төлбөр тооцооны хэмжээ ердөө нэг долоо хоногийн дотор 26 хувиар буурчээ. Хямрал эхэлсэн өдөр тус компанийн гүйцэтгэх захирал Сон Жун Хёныг нэн даруй албан тушаалаас нь чөлөөлсөн байна.
Старбакс Солонгос компанийн 67.5 хувийг эзэмшдэг "Шинсэге Групп" (Shinsegae Group)-ээс явуулсан дотоод шалгалтаар удирдлагуудын хариуцлагагүй байдал илэрчээ. Маркетингийн кампанит ажлыг баталсан менежерүүд болон албан тушаалтнууд дизайны файл, сурталчилгааны материалыг агуулсан цахим шуудангийн хавсралтыг нээж ч үзээгүй бөгөөд ямар нэгэн хууль эрх зүйн хяналтгүйгээр шууд цацсан нь тогтоогдсон байна. Иймд "Шинсэге Групп" бүх салбараа түр хаах шийдвэр гаргаснаар алдаандаа хэр зэрэг ноцтой хандаж байгаагаа харуулах, цаашид түүхийн мэдрэмжгүй байдал дахин давтагдахгүй байх баталгаа болно гэж мэдэгдэв.
Ажилтнуудын сургалтаас гадна 2026 оны зургаадугаар сарын 24-ний лхагва гарагт "Шинсэге Групп"-ын ТУЗ-ийн дарга Чон Ён Жин болон "Шинсэге", "И-Март" (E-Mart), "Старбакс Солонгос" компанийн дээд түвшний удирдлагууд түүх, социологийн ухааны профессоруудаар удирдуулсан тусгай сургалтад биечлэн хамрагдахаар болжээ.
Энэхүү хэрэг явдал нь дэлхийн хэмжээний брэндүүд орон нутгийн түүх, соёлын онцлогийг хүндэтгэхгүй байх нь бизнесийн болон нэр хүндийн асар том хохирол дагуулдгийг харуулсан тод жишээ болж байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.