Нэрт жүжигчнийг хиймэл оюун ухаан ашиглан гүтгэсэн юүтүберийг баривчилжээ
Сөүл хотын Төв дүүргийн шүүхээс Өмнөд Солонгосын алдартай жүжигчин Ким Сү Хёны нэр хүндэд халдаж, хуурамч мэдээлэл тараасан хэргээр "Hover Lab" сувгийн эрхлэгч Ким Сэ Үйг 2026 оны тавдугаар сарын 26-ны өдөр баривчлах зөвшөөрөл олгожээ.
Түүнийг хиймэл оюун ухаан ашиглан нотлох баримт хуурамчаар үйлдэж, бусдыг гүтгэсэн, айлган сүрдүүлсэн гэх үндэслэлээр саатуулжээ.
Энэхүү дуулиан нь 2025 оны хоёрдугаар сард 24 насандаа амиа хорлож нас барсан жүжигчин Ким Сэ Ронтой холбоотой юм.
"Hover Lab" сувгийн эрхлэгч Ким Сэ Үй нь мөн оны гуравдугаар сараас эхлэн жүжигчин Ким Сү Хёныг талийгаачтай насанд хүрээгүй байхад нь бэлгийн харилцаанд орсон, мөн өрөө төлөхийг шаардсан дарамт шахалт нь түүнийг үхэлд хүргэсэн гэх худал мэдээллийг тарааж эхэлжээ. Ингэхдээ тэрээр хиймэл оюун ухааны дуу хоолой хувилах дэвшилтэт технологи ашиглан Ким Сэ Роны хоолойг дуурайлган хийсэн хуурамч аудио бичлэг цацсан байна. Мөн 2016 оны "KakaoTalk" зурвасын хуулбарыг засварлаж, илгээгчийн нэрийг "Ким Сү Хён" болгон өөрчилснийг цагдаагийн байгууллагын шинжилгээгээр тогтоожээ.
Зохион байгуулалттайгаар тараасан эдгээр хуурамч мэдээлэл нь Ким Сү Хёны нэр хүнд, ажил амьдралд ноцтой хохирол учруулсан байна. Жүжигчин залуу 2025 оны гуравдугаар сард хэвлэлийн бага хурал зарлаж, нулимс дуслуулан өөрийн гэм буруугүйг нотлохоо амлаж байсан ч олон нийтийн зүгээс хүчтэй шүүмжлэлд өртсөөр байв. Цагдаагийн тайланд дурдсанаар, тэрээр зар сурталчилгааны гэрээ болон кино төслүүдээ цуцлуулсны улмаас хэдэн арван тэрбум воны алдагдал хүлээж, сэтгэл зүйн гүн хямралд орсноор эмчилгээ хийлгэхэд хүрсэн байна.
Сөүлийн шүүхийн гадаа сэжигтэн Ким Сэ Үй өөрт тулгасан хэргүүдийг эрс үгүйсгэж, баривчлах шийдвэрийг утгагүй үйлдэл хэмээн мэдэгджээ. Тэрээр мөрдөн байцаалтын үйл явцыг хуйвалдаан гэж үзэж байгаа бөгөөд өөрийг нь баривчлахыг шаардсан цагдаа, прокуроруудын эсрэг хуулийн дагуу гомдол гаргана гэдгээ илэрхийлсэн байна. Гэсэн хэдий ч шүүхээс сэжигтнийг оргон зайлж, нотлох баримт устгаж болзошгүй гэж үзэн баривчлах шийдвэрийг эцэслэн баталжээ.
Жүжигчний харьяалагддаг "Gold Medalist" агентлаг 2026 оны тавдугаар сарын 27-ны өдөр албан ёсны мэдэгдэл гаргаж, шүүхийн шийдвэрийг сайшааж байгаагаа илэрхийлэв. Цагдаагийн нарийвчилсан шалгалтаар "Hover Lab" сувгийн дэлгэсэн бүх баримт хуурамч болох нь хуулийн дагуу бүрэн батлагдсаныг тэд онцолсон юм.
Энэхүү хэрэг нь хиймэл оюун ухааны тусламжтайгаар бүтээгдсэн "deepfake" буюу хуурамч контент ашиглан олны танил эрхмүүдийн нэр хүндэд халдаж, ажил, амьдралыг нь сүйрүүлсэн гэмт хэргийг шүүхээр шийдвэрлэж буй анхны тохиолдлуудын нэг тул Өмнөд Солонгос төдийгүй олон улсын анхаарлын төвд байна.
Эх сурвалж:
• koreajoongangdaily.joins.com
• scmp.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.