🔴Н.Алтанхуяг: Ёс зүй гэх хэмжиж болдоггүй шалгуураар парламентын институцийг нурааж болохгүй

УИХ-ын гишүүн Н.Алтанхуяг парламентын гишүүдийн хариуцлага, ёс зүйн асуудал болон Ерөнхийлөгчийн зүгээс санаачлан оруулж ирж буй хуулийн төслийн талаар байр сууриа илэрхийллээ.

Тэрээр УИХ-ын гишүүдийн зан харилцаа, хуралдааны ирцтэй холбоотой шүүмжлэлүүд бодит байдал дээр байгааг хүлээн зөвшөөрсөн боловч үүнийг Ерөнхийлөгчийн институци хууль санаачлах замаар шийдвэрлэх гэж буйг дэмжихгүй байгаагаа илэрхийллээ. 

УИХ-ын гишүүн Н.Алтанхуяг:

-Манай улсад "гоё" нэртэй хууль оруулж ирэн, олон нийтийн дунд том хэмжээний сурталчилгаа хийж, түүнийхээ ард өөр зорилго агуулдаг "хуурамч ертөнц" бий болсон байна. Ерөнхийлөгч, Ерөнхий сайд, УИХ гэдэг бол эрх мэдлээ маш зөв хуваарилах ёстой институциуд.

Ерөнхийлөгч ард түмнээс сонгогдсон хүний хувьд өөрийн эрх, үүргээ хэрэгжүүлэх ёстой бол УИХ-ын гишүүд ч мөн ард түмнээс олгогдсон бүрэн эрхээ эдлэх ёстой. Үе үеийн Ерөнхийлөгч нар өөрт байгаа эрх мэдлээ дутуудуулж байсан түүх байхгүй, харин ч илүүдүүлж ирсэн.

Парламентын гишүүнийг эргүүлэн татах асуудалд "ёс зүй" гэх хэмжиж боломгүй субъектив шалгуур тавих нь их том цоорхой үүсгэнэ. Тухайлбал, хуралдаандаа огт үг хэлдэггүй ч ирц нь 100 хувь байдаг гишүүн, эсвэл үзэл бодлоо илэрхийлж ширүүн үг хэлсэн гишүүн хоёрын хэнийг нь ёс зүйгүй гэж үзэх вэ гэдэг нь тодорхойгүй юм. Ийм хэмжигдэхүүн байхгүй зүйлээр институцийг хэмжих нь тогтолцоог ганхуулах эрсдэлтэй. 

Өнөөдөр нийгэмд үүсээд буй авлига, албан тушаалын хэргүүд болон иргэдийн амьжиргааны доройтол зэрэг бодит асуудлууд орхигдож байгаад харамсаж байна. 110 сая гаруй долларын асуудал яригдаж байхад түүнийг шийдэх тухай биш, харин "хэдэн гишүүнийг алаад өгье" гэж байна. Энэ бол нийгмийн анхаарлыг өөр тийш нь хандуулж байгаа хэлбэр. Өмнө нь давхар дээлний асуудлаар яг ингэж тоглолт хийж байсан ч өнөөдөр тэр нь Үндсэн хуулиараа зөвшөөрөгдөөд явж байна.

УИХ-ын гишүүдийн хариуцлагыг сайжруулахын тулд заавал Ерөнхийлөгч оролцох албагүй. Парламент өөрөө ёс зүйн дүрмээ чангатгаж, дотооддоо асуудлаа шийдвэрлэх бүрэн боломжтой. Ард түмний амьжиргааг дээшлүүлэх, аж ахуйн нэгжүүдээ дэмжих, авлигатай бодитой тэмцэх зэрэг улс орны амин чухал асуудлуудыг цаг үеийн шинжтэй улс төрийн шоунаас дээгүүр тавих ёстой гэв.