🔴Д.Мөнх-Эрдэнэ: Баянхонгор аймагт Х.Баттулга битүү мөнгө тараасан. 2028 оныг Ардын намд бэлэглэх гэж байна

Ардчилсан намын дотоод хагарал, шинэчлэлийн үйл явц болон удирдлагуудын хариуцлагын асуудлаар намын гишүүдийн дунд шүүмжлэл өрнөж байна. Д.Мөнх-Эрдэнэ сүүлийн жилүүдэд зохион байгуулагдаж буй томоохон арга хэмжээ, цуглаануудыг бодит ажил хэрэг биш, ердөө "концерт" төдий шоу болж хувирсанд харамсаж байгаагаа илэрхийллээ. Ард түмэн Ардчилсан намаас жинхэнэ утгаараа сөрөг хүчин байж, бодит шинэчлэл хийхийг хүлээж байгаа ч өнөөгийн удирдлагууд "жүжиг тоглож" байна хэмээн шүүмжилсэн юм. 

АН-ын гишүүн Д.Мөнх-Эрдэнэ: 

-Намын дотоод хариуцлагын тогтолцоо алдагдсаныг түүхэн жишээнээс харж болно. Тухайлбал, 2012 онд Н.Алтанхуяг даргын үед нам эвтэй байж ялалт байгуулж байсан. Түүнээс хойш З.Энхболд, С.Эрдэнэ, Л.Гантөмөр нарын удирдлагын үед нам хагарч, сонгуулиудад дараалан бүдэрсэн. Гэвч эдгээр удирдлагууд хариуцлага хүлээхийн оронд албан тушаал ахиж, эсвэл намын хяналтын бүтцэд дахин орж ирж байгаад гишүүд дургүйцэж байна. 

Ялангуяа Үндэсний бодлогын хорооны бүрэлдэхүүнд орж ирж буй шинэ гишүүдийн чадамжийн асуудал анхаарлын төвд байгаа. Намын бодлогыг тодорхойлох 300 гишүүн нь амьдралаа зассан, салбартаа хүлээн зөвшөөрөгдсөн шилдэг хүмүүс байх ёстой атал өнөөдөр фракцуудын "кнопчингууд" болон санхүүгийн чадамжгүй хүмүүсээр дүүрсэн. Энэ байдал нь 2028 оны сонгуульд Ардчилсан нам МАН-ын олигархуудтай өрсөлдөх чадваргүй болгож магадгүй. 

Экс Ерөнхийлөгч Х.Баттулгын нөлөө намын дотоод үйл ажиллагаанд хүчтэй хэвээр байгаа.

Түүний фракцынхан болон "троллууд" намын шийдвэр гаргах түвшинд олноор орж ирж байгаа нь намыг хувьчилж авах гэсэн оролдлого. Баянхонгор аймаг болон Нийслэлийн намын хороо бодит бүтээн байгуулагч, инженер хүмүүсийн оронд "шүлэг уншдаг" хүмүүсээр удирдлагаа бүрдүүлсэн. Энэ бол 2028 оны сонгуулийн ялалтыг МАН-д бэлэглэж байгаа хэрэг.

Намын удирдлагууд олон давхар дээл өмсөж, ажлаа сарниулж байгааг зогсоох шаардлагатай. О.Цогтгэрэл дарга намын бүлгийн даргын ажлаа өгч, зөвхөн намын шинэчлэл, эв нэгдлийн төлөө ажиллах хэрэгтэй. Ардчилсан нам 2028 онд ялалт байгуулахын тулд нийгмийн сэтгэл зүйг мэдэрдэг, шударга ёсны төлөө тэмцдэг, ахуй амьдралаа зассан бодит дүрүүдээр багаа бүрдүүлэх шаардлагатай байгаа гэв.