🔴 Б.Пүрэвдорж: Татварын багц хуулийн шинэчлэлээр татварын ачааллыг бодитоор бууруулах шаардлагатай

УИХ-ын гишүүн Б.Пүрэвдорж парламентын гишүүдийн хариуцлага, ёс зүйн асуудлаар байр сууриа илэрхийллээ.

Тэрээр саяхан Монгол Улсын Ерөнхийлөгч Ховд аймагт иргэдтэй уулзах үеэр иргэд 100 хувь энэхүү хуулийн төслийг дэмжиж байсныг онцлов. Ард түмэн төрийн түшээдээс хариуцлагатай, ёс зүйтэй байхыг шаардаж байгаа бөгөөд гишүүд сонгогчдынхоо санал бодлыг төрийн бодлогод тусгах үүрэгтэйг санууллаа.

УИХ-ын гишүүн, УИХ-ын дэд дарга Б.Пүрэвдорж:

-Хуулийн төслийн гол зорилго нь парламентын дархлааг хамгаалахын зэрэгцээ гишүүдийн үйл ажиллагааг илүү хариуцлагатай болгоход оршиж байгаа юм. Уг хууль нь батлагдсан өдрөөсөө эхлэн хэрэгжих тул өш хонзон авах, хэн нэгнийг хэлмэгдүүлэх хэрэгсэл болохгүй. Харин гишүүд чуулгандаа идэвхтэй оролцох, иргэдтэйгээ уулзаж асуудлыг нь шийдвэрлэхэд анхаардаг болно. Ингэснээр парламентын нэр хүнд, төрийн үнэлэмж өсөх ач холбогдолтой.

МАН-ын гишүүд нэгнийгээ "хулгайч"-аар дуудаж, засаг огцруулах үеэр хэрэлдэж тэмцэлддэг ч албан тушаалд очсоныхоо дараа асуудлыг мартаж, чимээгүй болдог. Энэхүү албан тушаалын төлөөх тэмцэл, хариуцлагагүй байдалд ард иргэд сонгуулиар дүнгээ тавьж, бодит хариуцлага тооцох ёстой.

Өнгөрсөн арван жилийн хугацаанд Ардын нам бүх төрлийн татвар, хураамжийг нэмэгдүүлснээр аж ахуйн нэгжүүд санхүүгийн хүнд дарамтад орж, үйл ажиллагаа нь доголдоход хүрсэн. Ялангуяа нийгмийн даатгалын өртэй гэх шалтгаанаар ААН-үүдийн дансыг шууд хаадаг байдал нь бизнесийн орчинд сөргөөр нөлөөлж байна. Иймд татварын багц хуулийн шинэчлэлээр татварын ачааллыг бодитоор бууруулах шаардлагатай гэв.