🔴 Ж.Бат-Эрдэнэ: УИХ-ын үйл ажиллагаа нэг талыг барьсан буюу намын эрх ашгаас ангид байх ёстой

УИХ-ын дэд дарга Ж.Бат-Эрдэнэ УИХ-ын гишүүн Х.Тэмүүжингийн өргөн барьсан хуулийн төслийг дэмжиж байгаагаа илэрхийллээ. Тэрээр уг хуулийн төслийг хэлэлцэх нь УИХ-ын бүрэн эрхийн асуудал боловч хувь хүнийхээ үүднээс олон намын тогтолцоог бэхжүүлэх, парламентын хяналтыг сайжруулахад чухал ач холбогдолтой гэж үзэж байна.

Ж.Бат-Эрдэнэ Үндсэн хуулийн өөрчлөлтийг хамгийн их дэмжсэн гишүүдийн нэг гэдгээ онцлоод, үүний гол зорилго нь олон намын тогтолцоог бодитойгоор бий болгох байсан гэв. Түүний хэлснээр, олон намын тогтолцоо бүрдсэнээр зөвхөн хоёр нам хуйвалдах бус, УИХ-аас гаргаж буй шийдвэрүүд илүү чамбайрч, Засгийн газарт тавих хяналт эрс сайжрах үндэс бүрдэх ажээ.

Тэрээр мөн УИХ-ын үйл ажиллагаа нэг талыг барьсан буюу намын эрх ашгаас ангид байх ёстойг дурдлаа. Өмнөх парламентын үед гишүүдийн үг хэлэх эрхийг хаах, техникийн боломжийг хязгаарлах зэрэг сөрөг тохиолдлууд гарч байсныг сануулаад, шинэ хуулийн төсөл нь парламентыг илүү ардчилсан, зөв голдиролд оруулахад тусална гэж найдаж байгаагаа илэрхийлэв.

МАН доторх хагарал болон "30:18" гэх хуваагдлын талаарх асуултад тэрээр хариулахдаа, нам дотор үзэл бодлын зөрүү байх нь хэвийн үзэгдэл бөгөөд үүнийг хагарал гэж үзэхгүй байгаагаа хэллээ. Ард түмний итгэлийг хүлээж сонгогдсон гишүүн бүр өөрийн үзэл бодол, сонгогчдынхоо дуу хоолойг илэрхийлэх эрхтэй бөгөөд энэ нь парламентын амьд харилцааны нэг хэсэг гэдгийг онцолсон юм.

Хуулийн төслийг хэлэлцэх цаг хугацааны тухайд "Аливаа зүйлд тохиромжтой үе буюу момент гэж бий" хэмээн тайлбарлав. Өмнө нь дэмжигдэх боломжгүй байсан асуудлууд нийгэм, эдийн засгийн өөрчлөлт болон олон намын тогтолцооны шинэ нөхцөл байдалд зайлшгүй хэлэлцэх шаардлагатай болж ирдэг бөгөөд өнөөдөр энэ асуудлыг нэг талд нь гаргаж, шийдвэрлэх нь зүйтэй гэсэн байр суурийг илэрхийллээ.