🔴О.Цогтгэрэл: УИХ-ын дарга Н.Учрал чуулганы хуралдааныг удирдсан тохиолдолд бид хуралдаанд суухгүй

АН-ын бүлгээс УИХ-ын дарга нь аль нэг намын дарга байж болохгүй гэсэн зарчмын шаардлагыг тавьж байна. Хэрэв өнөөдрийн хуралдааныг Н.Учрал дарга удирдвал АН-ын бүлэг оролцохгүй бөгөөд харин дэд дарга удирдсан тохиолдолд бүрэн бүрэлдэхүүнээрээ оролцож, асуудлаа хэлэлцэхэд бэлэн байгаагаа мэдэгдэв.

Ардчилсан намын дарга О.Цогтгэрэл хувь гишүүнийхээ хувьд 2024 оны сонгуулиас хойш хамтарсан засагт орох нь буруу гэсэн байр сууриа тууштай хадгалж байгаагаа илэрхийлэв.

Одоогийн засгийн газрын үйл ажиллагааны тухайд, МАН-ын дотоод улс төрийн зөрчил нь засаглалын хямралд хүргэж байгааг шүүмжиллээ. Ерөнхий сайд бие даан бүрэн дүүрэн шийдвэр гаргах эрх мэдэлгүйгээр засгийн газрыг ажиллуулж байгаа нь харамсалтай бөгөөд үүний хохирогч нь эцсийн дүндээ Монголын ард түмэн, сонгогчид болж байна гэж үзэж байна.

Цаашид байгуулагдах шинэ засгийн газарт АН-ын зүгээс өндөр шаардлага тавьж ажиллахаа мэдэгдэв. Шинэ бүтэц нь данхар биш, үр ашигтай, эдийн засгийн эрх чөлөөг дэмжсэн байх ёстойг санууллаа. Мөн авлигын үндсийг таслах зорилготой Нууцын тухай хуулийн төслийг яаралтай хэлэлцэн батлах шаардлагатай байгааг онцлоод, өөрийн зүгээс боловсруулсан хуулийн хувилбараа өргөн барихад бэлэн болсноо дуулгав.