Пол Маккартни бага насны дурсамжаа өгүүлсэн шинэ цомгоо зарлалаа
Домогт "The Beatles" хамтлагийн гишүүн Пол Маккартни өөрийн 18 дахь бие даасан студийн цомог болох "The Boys of Dungeon Lane"-ийг 2026 оны тавдугаар сарын 29-ний өдөр MPL/Capitol Records-оор дамжуулан гаргахаа албан ёсоор зарлалаа.
Энэхүү бүтээл нь түүний хувьд хамгийн дотно бөгөөд өөрийн дотоод ертөнцийг нээсэн цомог болж байгаа бөгөөд зарласан өдөртөө буюу гуравдугаар сарын 26-нд "Days We Left Behind" нэртэй эхний синглээ олон нийтэд хүргэсэн байна.
Шинэ цомгийн продюсероор сүүлийн үед "The Rolling Stones" болон Эдди Веддертэй хамтран ажилласан Эндрю Уатт ажиллажээ. Маккартни, Уатт нар 2021 онд Лос-Анжелес хотод танилцсанаар энэхүү хамтын ажиллагаа эхэлсэн түүхтэй. Тэрээр өөрийн "McCartney" цуврал цомгуудын уламжлалыг хадгалж, ихэнх хөгжмийн зэмсгийг өөрөө тоглосон бөгөөд бичлэгийн ажил сүүлийн таван жилийн турш Лос-Анжелес болон Сассекс дахь студиудад үргэлжилсэн байна.
"The Boys of Dungeon Lane" цомог нь Маккартнигийн Ливерпүүл дэх бага насны дурсамж, тэр дундаа Спик дүүрэг дэх гэр бүлийнх нь амьдарч байсан гудамжны нэрээр нэрлэгджээ. Дуунуудад дайны дараах хүүхэд нас, эцэг эхийнх нь тэсвэр хатуужил, мөн "The Beatles" хамтлаг байгуулагдахаас өмнөх Жон Леннон, Жорж Харрисон нартай өнгөрүүлсэн эхэн үеийн харилцааг өгүүлсэн байна. Сонирхолтой нь, төслийн санаа Эндрю Уатттай уулзах үеэрээ гитар дээр танихгүй "нууцлаг аккорд" олж тогтоосноор эхэлсэн бөгөөд энэ нь цомгийн эхний дуу болох "As You Lie There"-ийн үндэс болжээ.
Нийт 14 дуунаас бүрдэх тус цомогт дурсамж хөврүүлсэн хүүрнэлээс гадна түүний эхнэр Нэнси Шевеллт зориулсан хайрын дуунууд багтсан байна. Жагсаалтад "Lost Horizon", "Ripples in a Pond", "Mountain Top" зэрэг бүтээлүүд багтсан бөгөөд "Salesman Saint" болон "Momma Gets By" зэрэг дуунууд нь түүний амьдралын өөр өөр үе шатуудыг илэрхийлж байгаа юм. Энэхүү цомог нь 2020 онд гарсан "McCartney III" цомгоос хойшх анхны бие даасан студийн ажил болж байна.
Шинэ цомгийн нээлттэй зэрэгцэн Лос-Анжелес дахь "Fonda Theatre"-т цөөн тооны үзэгчдэд зориулсан тоглолт хийхээр төлөвлөж байгаа нь шүтэн бишрэгчдийнх нь хүлээлтийг улам нэмэгдүүлж байна. Мөн найруулагч Сэм Мендесийн "The Beatles" хамтлагийн тухай намтарчилсан кино төсөл олны анхаарлын төвд байгаа энэ үед Маккартнигийн шинэ бүтээл гарч байгаа нь цаг үеэ олсон үйл явдал боллоо. Одоогоор цомгийн урьдчилсан захиалга пянз болон дижитал хэлбэрээр нээгдээд байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.