🔴П.Батчимэг: УИХ-ын дарга нь эрх баригч намын даргын албан тушаалыг давхар хашиж байгаа нь зохимжгүй

УИХ дахь Ардчилсан намын бүлгийн гишүүд парламентын спикер нь улс төрийн намын дарга байх ёсгүй гэсэн байр суурьт нэгдсэн. Тус бүлгийн 42 гишүүний 41 нь УИХ-ын дарга парламентыг удирдахдаа аль нэг намын эрх ашгийг бус, нийт парламентын бие даасан байдлыг хангах ёстой гэж үзэж байгаа юм. Энэхүү шийдвэр нь улс төржилт биш, харин парламентын засаглалын дархлааг хамгаалж буй зарчмын асуудал болохыг гишүүд онцолж байна.

УИХ-ын гишүүн П.Батчимэг энэ асуудлаар байр сууриа илэрхийлэхдээ, бүлгийн гаргасан шийдвэрийг бүрэн дэмжиж байгаагаа мэдэгдлээ. Тэрээр хэлэхдээ, "Парламентад таван намын төлөөлөл бүхий 126 гишүүн ажиллаж байхад УИХ-ын дарга нь эрх баригч намын даргын албан тушаалыг давхар хашиж байгаа нь зохимжгүй. Хэрэв УИХ-ын дарга намын ажлаа хийхийг хүсэж байгаа бол спикерийн суудлаа өгч, өөр гишүүнд боломж олгох хэрэгтэй" хэмээв.

Мөн хаврын чуулганы нээлтийн үеэр УИХ-ын даргын хэлсэн үг нь парламентын спикерийн бус, харин МАН-ын Бага хурлын даргын илтгэл шиг сонсогдсон нь гишүүдэд таагүй сэтгэгдэл төрүүлснийг дурдлаа. Нэг намын бодлого парламентад шууд нөлөөлж байгаа нь хууль тогтоох дээд байгууллагын хараат бус байдалд сөргөөр нөлөөлж байна гэж үзэж байна. Тиймээс АН-ын бүлэг энэхүү гажуудлыг засахын төлөө хатуу зогсох болно гэдгээ илэрхийллээ.