🔴Д.Ганбат: МАН ажлаа хийж чадахгүй байгаагаа Ардчилсан нам руу чихэж байна

УИХ дахь Ардчилсан намын бүлгийн гишүүд чуулганы болон байнгын хорооны хуралдаанд оролцохгүй байгаатай холбоотойгоор парламентын үйл ажиллагаа хоёр долоо хоногийн турш саатаад байна. Тус намын зүгээс тавьж буй гол шаардлага нь УИХ-ын дарга улс төрийн намын удирдлага байх ёсгүй гэсэн зарчим юм. Энэхүү улс төрийн акц болон цаг үеийн тулгамдсан асуудлуудын талаар УИХ-ын гишүүн Д.Ганбат байр сууриа илэрхийллээ.

Тэрээр хэлэхдээ, 2024 оны сонгуулийн үр дүнгээр МАН 68 суудал авч, хамтарсан намуудтайгаа нийлээд 80 орчим гишүүнтэй олонхыг бүрдүүлж байгаа. Иймд олонх өөрсдөө ирцээ бүрдүүлж, засгийн газрын үйл ажиллагаа болон төрийн ажлыг тасралтгүй явуулах бүрэн боломжтой атал цөөнх болох АН-ыг буруутгаж байгааг ойлгохгүй байна. АН-ын зүгээс зөвхөн сахилга баттай байж, чуулганы хуралдааныг үр дүнтэй зохион байгуулахыг шаардаж байгаа бөгөөд олонх ирцээ бүрдүүлсэн тохиолдолд хуралдаанд оролцоход бэлэн байгаагаа мэдэгдлээ.

Парламентын спикер намын дарга байх нь гишүүдийн үг хэлэх, үзэл бодлоо илэрхийлэх эрх чөлөөнд халддаг сөрөг туршлага өмнө нь байсныг тэрээр сануулав. Тухайлбал, намын дарга УИХ-ыг удирдаж байх үедээ гишүүдийн үг хэлэх хугацааг таслах, амыг нь хаах зэрэг бүдүүлэг үйлдлүүд гаргаж байсан нь парламентын засаглалын нэр хүндэд халгаатай гэж үзэж байна. Тиймээс УИХ-ын дарга нь аль нэг намын ашиг сонирхлоос ангид, төвийг сахисан байх ёстой гэсэн байр суурийг АН-ын бүлгийн 42 гишүүн 100 хувийн саналаар дэмжсэн байна.

Мөн Ерөнхийлөгчөөс өргөн мэдүүлсэн хуулийн төслийн талаар дурдахдаа, УИХ-ын гишүүний халдашгүй бүрэн эрх нь авлига, хулгайн хэргийг нуун дарагдуулах хэрэгсэл болох ёсгүй. Өнөөдөр 126 гишүүнтэй болсон нь зарим гишүүд хуулийн байгууллагад шалгагдаж байх хооронд төрийн ажил гацахгүй явах боломжийг олгож байгаа юм. УИХ-ыг "хулгайч нарын орогнох газар" гэж харагдуулахгүйн тулд гишүүд өөрсдөө бүрэн эрхээсээ түдгэлзэж, шалгуулдаг соёл тогтох ёстойг тэрээр уриалав.

Улс орны гадаад нэр хүнд болон иргэдийн амьдралд тулгамдаж буй асуудлууд авлигатай шууд холбоотой байгааг гишүүн шүүмжиллээ. Авлигын индексээр Монгол Улс ухарч, үүний улмаас АНУ, Япон, Солонгос зэрэг орнууд визийн нөхцөлөө чангатгаж байгаа нь залуучуудын боломжийг хязгаарлаж байна. Иймд авлига, албан тушаалын хэрэгтэй тууштай тэмцэж, хариуцлага тооцох механизмыг сайжруулах шаардлагатай байгааг онцлоод, Харбины гэрээний асуудлаар нээлттэй сонсгол явуулах санаачилгыг гаргаж, гишүүдийн гарын үсгийг цуглуулж эхэлснээ мэдэгдэв.