Унгарын Гадаад хэргийн сайд Оросын тагнуул байсан уу
Унгарын Гадаад хэргийн сайд Петер Сиярто Европын Холбооны (ЕХ) хаалттай хуралдааны нууц мэдээллүүдийг ОХУ-ын Гадаад хэргийн сайд Сергей Лавровт тогтмол дамжуулдаг байсан гэх ноцтой дуулиан олон улсын анхаарлын төвд орлоо.
"The Washington Post" сонин Европын аюулгүй байдлын албаны эх сурвалжуудаас иш татан нийтэлсэн уг мэдээлэлд Сияртог ЕХ-ны гишүүн орнуудын байр суурь болон хэлэлцэж буй эмзэг асуудлуудын талаар Москвад "шууд тайлан" өгдөг байсан гэж буруутгажээ.
Уг нийтлэлд дурдсанаар, Петер Сиярто ЕХ-ны Сайд нарын зөвлөлийн хуралдааны завсарлага бүрийг ашиглан Сергей Лавров руу утсаар ярьж, хэлэлцүүлгийн явцыг нарийвчлан мэдээлдэг байсан аж. Европын аюулгүй байдлын нэгэн ажилтан энэ нөхцөл байдлыг "ЕХ-ны хуралдаан бүрт Москва ширээний ард сууж байсантай адил" хэмээн тодорхойлсон нь асуудал ямар түвшинд хүрснийг илтгэж байна. Энэхүү үйлдэл нь холбоотнуудын дунд тогтсон итгэлцлийг ноцтойгоор эвдсэн хэрэг боллоо.
Европын комиссын хэвлэлийн төлөөлөгч Анитта Хиппер 3 дугаар сарын 23-нд хийсэн мэдэгдэлдээ уг мэдээлэлд маш их түгшиж байгаагаа илэрхийлээд, Унгарын засгийн газраас албан ёсны тайлбар шаардсан юм. Одоогийн байдлаар ЕХ-ны зүгээс Унгар улсыг зарим нэг нууц, эмзэг хэлэлцээрт оролцуулахыг хязгаарлаж эхэлсэн гэх мэдээлэл байна. Польшийн Ерөнхий сайд Дональд Туск энэ талаар хэлэхдээ, холбоотнууд Унгарын Оростой тогтоосон харилцаанд эртнээс сэжиглэж байсан тул энэ мэдээлэлд гайхах зүйл алга гэж онцолжээ.
Харин Петер Сиярто өөрийн зүгээс эдгээр буруутгалыг "худал мэдээ" болон "утгагүй хуйвалдааны онол" хэмээн эрс няцааж байна. Тэрээр Оросын талтай харилцаатай байх нь Унгарын эрчим хүчний аюулгүй байдлыг хангахад чиглэсэн хэвийн дипломат үйл ажиллагаа гэж тайлбарласан. Унгарын Ерөнхий сайд Виктор Орбан уг нийтлэлийг Унгар улс руу хийсэн халдлага гэж нэрлээд, засгийн газрын гишүүнийг хууль бусаар тагнаж чагнасан асуудлыг шалгахыг Хууль зүйн сайддаа үүрэг болгоод байна.
Дотоод улс төрийн нөхцөл байдал ч хурцдаж байгаа бөгөөд 2026 оны 4 дүгээр сарын 12-нд болох парламентын сонгуульд Орбаны гол өрсөлдөгч Петер Мажьяр энэ үйлдлийг "эх орноосоо урвасан хэрэг" гэж тодорхойлов. Тэрээр хэрэв сонгуульд ялбал Сиярто болон Оросын тагнуулын албаны хэлхээ холбоог нарийвчлан шалгана гэдгээ амласан юм. Мөн уг дуулианы хажуугаар Оросын нууц албад Орбаны нэр хүндийг өсгөхийн тулд түүний амь насанд халдах гэж буй хуурамч оролдлого зохион байгуулах талаар хэлэлцэж байсан байж болзошгүй гэх баримт ил болсон нь байдлыг улам ээдрээтэй болгож байна.
Петер Сияртог Оросын тагнуул байсан гэж албан ёсоор тогтоогоогүй байгаа ч Европын томоохон гүрнүүд болон ЕХ-ны институтууд түүнийг Оросын эрх ашигт үйлчилсэн гэж ноцтойгоор буруутгаж байна. Энэхүү үйл явдал нь Унгар улсын Европын Холбоон дахь байр суурь болон ирэх сард болох сонгуулийн үр дүнд шийдвэрлэх нөлөө үзүүлэхээр байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.