🔴П.Сайнзориг: Хууль зүйн сайд болон дэд сайд нарыг Засгийн газар яаралтай чөлөөлж, шалгуулах ёстой

ХЗДХ-ийн сайд Б.Энхбаярыг албан тушаалаа өгч, хуулийн байгууллагаар шалгуулах ёстой гэх байр суурийг зарим гишүүд илэрхийлж байна. УИХ-ын гишүүн Л.Оюун-Эрдэнэ Хууль зүй, дотоод хэргийн сайд Б.Энхбаярыг Авлигатай тэмцэх газарт өгч шалгуулахаар хандсан бөгөөд энэ нь улс төрийн хүрээнд томоохон маргаан дагуулаад байгаа юм.

Өмнө нь УИХ-ын дарга Д.Амарбаясгалан асуудалд холбогдохдоо ажлаа өгөөд шалгуулж байсан жишиг бий. Шударга ёсны салбарыг толгойлж буй сайд ийм ноцтой асуудалд нэр холбогдсон тохиолдолд ёс зүйн хариуцлага хүлээж, үүрэгт ажлаасаа чөлөөлөгдөн шалгуулах нь зүйтэй гэж үзэж байна. Тэр дундаа Б.Энхбаяр сайд Тусгай хяналтын дэд хороог ахалж байгаа нь үндэсний аюулгүй байдал, нууц төсөв, гүйцэтгэх ажилтай холбоотой мэдээлэлд нэвтрэх эрх олгодог тул хэрэг хянан шийдвэрлэх ажиллагаанд нөлөөлөх эрсдэлтэйг анхаарууллаа.

Хэргийн гол агуулга нь цагдаагийн албан хаагчдын цалин хөлсөнд зориулагдсан төсвийг зориулалт бусаар зарцуулж, нэгэн компани руу их хэмжээний мөнгө шилжүүлсэн асуудал юм. Төсвийн тухай хуулиар цалингийн санг өөр зүйлд зарцуулахыг хориглодог атал улс төрийн нөлөө бүхий этгээдийн компанид давуу байдал олгож, 7 тэрбум төгрөгийн өр төлбөрийг барагдуулсан нь ноцтой зөрчил гэж үзэж байна. Шилэн дансны мэдээллээс харахад 2024 оны тавдугаар сард дахин 2 тэрбум төгрөгийг тус компанид олгосон баримт байгаа аж.

Төрийн буруутай үйл ажиллагаанаас болж хохирсон, шүүхийн шийдвэр нь гарсан олон иргэн, аж ахуйн нэгж нөхөн төлбөрөө авч чадахгүй олон жил хүлээж байна. Жил бүр улсын төсөвт энэ зориулалтаар ердөө 2 тэрбум төгрөг тусгадаг атал нэг компанид ийм давуу эрх олгосон нь шударга бус юм. Хохирсон иргэдийн дунд эрүүл мэндээрээ хохирсон, үндэслэлгүйгээр ажлаасаа халагдсан, эрүүдэн шүүгдсэн хүмүүс байдаг ч төсөв хүрэлцээгүй гэх шалтгаанаар хохирлоо барагдуулж чаддаггүй байна.

Мөн энэ хэрэгтэй холбоотойгоор гэрчүүдийн аюулгүй байдлыг хангах асуудал хөндөгдөж байна. Шүгэл үлээгчийн эрх зүйн байдлын тухай хуулийг яаралтай баталж, авлигын эсрэг дуугарч буй иргэдийг хамгаалах шаардлагатай. Гэтэл хууль эрх зүйн орчныг бүрдүүлэх ёстой салбарын сайд нь өөрөө шүгэл үлээгчид рүү дайрч давшлах биш, хуулийн байгууллагаар асуудлаа эцэслэн шийдвэрлүүлэх нь хамгийн зөв гарц юм.

Хууль зүй, дотоод хэргийн яамны удирдлагууд, тэр дундаа дэд сайдтай холбоотой асуудлууд яригдаж байгаа энэ үед Засгийн газар яаралтай арга хэмжээ авч, холбогдох албан тушаалтнуудыг чөлөөлж шалгуулах ёстой. Төрийн эрх мэдлийг нэг этгээдэд давуу тал олгох хэрэгсэл болгон ашиглаж байгаа нь байж боломгүй үйлдэл гэлээ.