🔴Адууны цуснаас дээж авч, генийг тогтоох ажилд улсын төсвөөс зарцуулсан 600 орчим сая төгрөг алга болсон

Үндэсний их баяр наадмын хурдан морины уралдааныг монгол үүлдрийн адууны стандартад нийцүүлэн зургаан насны ангиллаар зохион байгуулах асуудлаар уяачдын төлөөлөл мэдээлэл хийлээ. 2022 оноос хойш Үндэсний их баяр наадмын тухай хуулийн шилжилтийн үеийн зохицуулалтын дагуу морьдыг зөвхөн сэрвээний өндрөөр нь хэмжиж уралдуулж ирсэн бөгөөд энэхүү түр журмын хугацаа дуусгавар болж байгааг тэд онцлов.

Стандартчилал, хэмжил зүйн газраас "Монгол үүлдрийн адууны стандарт"-ыг эцэслэн баталсантай холбогдуулан Засгийн газрын 2020 оны 257 дугаар тогтоолоор батлагдсан дүрэмд нэмэлт өөрчлөлт оруулах хууль зүйн шаардлага үүсээд байна. Уяачдын холбооны зүгээс сэрвээ хэмжих заалтыг хасаж, зөвхөн батлагдсан стандартад нийцсэн монгол адууг уралдуулах, стандартад нийцээгүй морьдыг хасах зохицуулалтыг тусгах саналыг Шадар сайдын ажлын алба болон Баяр наадам зохион байгуулах комисст удаа дараа хүргүүлжээ.

Мөн Малын генетик нөөцийн тухай хуулийн дагуу хурдан морьдыг улсын нэгдсэн мэдээллийн санд бүртгэлжүүлэх ажлыг Хөдөө аж ахуйн яам болон Морины бүртгэлийн дэд хороо улс орон даяар хариуцан гүйцэтгэх ёстойг санууллаа. Гэвч өнөөдрийг хүртэл холбогдох дүрэм журам эцэслэн батлагдаагүй байгаа нь уяачдын дунд хүлээлт, эргэлзээ үүсгээд байна.

Сүүлийн өдрүүдэд олон нийтийн сүлжээгээр даага, шүдлэн насны морьдын сэрвээний өндрийг нэмж баталсан гэх ташаа мэдээлэл тархсанд холбооны удирдлагууд залруулга хийлээ. Шадар сайдын ажлын албанаас тодруулснаар морьдын сэрвээний өндрийг өөрчлөх асуудал эцэслэгдээгүй байгаа бөгөөд хууль бус, үндэслэлгүй мэдээлэлд автахгүй байхыг нийт уяачдад уриалав.

Уяачдын төлөөлөл хэлэхдээ, "Монгол төрийн наадамд монгол морь уралдах ёстой. Сүүлийн 10 жил эрлийз адууны асуудлаас болж эгэл жирийн малчин уяачид сумынхаа наадамд ч мордох эрхгүй болоод байна. Үндсэн хуулиар хамгаалагдсан өв соёл, малын удмын санг хамгаалах ажил хэсэг бүлэг хүмүүсийн ашиг сонирхлоос болж саатаж байна" хэмээн байр сууриа илэрхийллээ.

Түүнчлэн адууны цуснаас дээж авч, генийг тогтоох ажилд улсын төсвөөс зарцуулсан 600 орчим сая төгрөгийн ажил зогссон асуудлыг шалгах шаардлагатайг онцлов. Уяачид Засгийн газрыг парламентаас баталсан хуулийг хэрэгжүүлж, 330 сумын малчдын эрх ашгийг хамгаалсан шийдвэр гаргахыг шаардаж байна. Хэрэв дүрэм журмыг хуульд нийцүүлэн яаралтай шинэчлэхгүй бол тэмцлийн дараагийн хэлбэрт шилжихээ мэдэгдлээ.