🔴А.Ариунзаяа: ХЗДХ-ийн сайд Б.Энхбаяр ажлаа өгөөд шалгуулах ёстой

УИХ-ын Хүний хөгжил, нийгмийн бодлогын байнгын хорооны хуралдаан ирц бүрдээгүйн улмаас хоёр дахь удаагаа хойшиллоо. Одоогийн байдлаар гишүүдийн ирц 30 орчим хувьтай байгаа бөгөөд Ардчилсан намын бүлэг улс төрийн мэдэгдэл хийж, тавьсан шаардлагаа биелүүлэх хүртэл хуралдаанд оролцох боломжгүй гэдгээ илэрхийлээд байна. Мөн зарим гишүүд гадаад болон дотоод томилолттой байгаа нь ирц бүрдэхгүй байхад нөлөөлжээ.

МАН-ын бүлгийн зүгээс уг асуудлаар нэгдсэн байр суурьт хүрээгүй байгаа бөгөөд гишүүд хувь хүний үүднээс асуудалд хандаж байна. Улс төрийн акц, маргаан мэтгэлцээн өрнөж байгаа ч талууд зөвшилцлийн ширээний ард сууж, төрийн ажлыг гацаахгүй байх гарц гаргалгааг эрэлхийлэх шаардлагатайг санууллаа. Тал талдаа хатуу байр суурь баримтлан "гүрийх" нь шийдэл биш бөгөөд маргааш, нөгөөдрийн чуулганы нэгдсэн хуралдааны ирц ч тодорхойгүй байна.

Засгийн газрын зарим сайд нарын томилгоо болон татварын багц хуулийн төсөл зэрэг нийгэм, эдийн засгийн чухал асуудлууд хүлээгдэж буй энэ үед улс төрийн нөхцөл байдал ийнхүү гацаанд орсон нь шүүмжлэл дагуулж байна. Ялангуяа боловсрол, эрчим хүчний салбарын сайд нарыг яаралтай томилох шаардлагатай байгаа ч улс төрийн акц нь төрийн ажлаас даваад байгааг гишүүд анхаарууллаа. Хэдийгээр сайд нар үүрэг гүйцэтгэгчээр ажиллаж байгаа ч салбарын бодлогыг тууштай авч явахад томилгооны асуудлыг нэн даруй шийдвэрлэх хэрэгтэй байгаа юм.

Хууль зүй, дотоод хэргийн сайд болон дэд сайдтай холбоотой ноцтой мэдээллүүд олны анхаарлыг татаж байна. УИХ-ын гишүүн Л.Оюун-Эрдэнийн зүгээс гаргасан баримтуудтай холбогдуулан Хууль зүйн сайдыг албан тушаалаасаа түдгэлзэж, шалгуулах ёстой гэсэн байр суурийг зарим гишүүд илэрхийлэв. Өмнө нь УИХ-ын дарга Д.Амарбаясгалан асуудалд холбогдохдоо өөрийн хүсэлтээр ажлаа өгч шалгуулж байсан жишгийг энд дурдаж, хуулийн салбарыг толгойлж буй хүмүүс ёс зүйн хариуцлага хүлээх ёстойг санууллаа.

Хууль зүйн дэд сайд Д.Мөнх-Эрдэнийг "Бодь"-ийн оффтек гэрээний асуудалд хуулийн зөвлөхөөр ажиллаж байсан гэх мэдээллийг Л.Оюун-Эрдэнэ гишүүн гаргасан бол дэд сайдын зүгээс үүнийг эрс үгүйсгэж байгаа юм. Энэхүү маргааныг эцэслэн шийдвэрлэхийн тулд тухайн үеийн хэлэлцээрийн протокол, аудио бичлэг зэрэг бодит нотлох баримтуудыг гаргуулан авах хүсэлтийг Ерөнхий сайдад хүргүүлээд байна. Хэн нь худал мэдээлэл өгч, хэн нь гүтгэж байгааг бодит баримтаар тогтоох нь төрийн албаны нэр хүнд болон хуулийн засаглалд чухал ач холбогдолтой юм гэлээ.