🔴Б.Дашпүрэв: АИ-92-оос бусад шатахуун, дизелийн үнэ 300 төгрөгөөр нэмэгдэнэ

Ойрх Дорнодын бүс нутагт үүсээд буй нөхцөл байдал дэлхийн эдийн засагт нөлөөлж, газрын тосны бүтээгдэхүүний үнэ өсөх хандлагатай байна. Үүнтэй холбогдуулан Монгол Улсын Засгийн газраас шатахууны үнийн өсөлтийг хязгаарлах, инфляцыг тогтвортой барих чиглэлээр шуурхай арга хэмжээ авч ажиллаж байна. Тэргүүн шадар сайдаар ахлуулсан ажлын хэсэг Монголбанк, Сангийн яам, Гадаад харилцааны яам болон шатахуун импортлогч компаниудын төлөөлөлтэй уулзаж, үүсээд буй нөхцөл байдлыг хэлэлцлээ.

Иргэдийн хамгийн өргөн хэрэглэдэг АИ-92 автобензиний үнэ ойрын хугацаанд нэмэгдэхгүй гэдгийг албаныхан мэдэгдэв. Тус бүтээгдэхүүнийг нэг тонныг нь 705 ам.доллароор худалдан авах бүтэн жилийн гэрээг тогтвортой үнээр байгуулсан тул үнийн өөрчлөлт орох үндэслэл байхгүй юм. ОХУ-ын Ангарскийн газрын тос боловсруулах үйлдвэрээс нийлүүлж буй Евро-2 стандартын шатахууны нийлүүлэлт хэвийн үргэлжилж байна.

Харин дизель түлшний хувьд дэлхийн зах зээл дээрх үнийн өсөлтөөс шалтгаалан литр тутамдаа 1000-1500 төгрөгөөр нэмэгдэх бодит нөхцөл байдал үүсээд байсан юм. Гэвч Засгийн газраас аж ахуйн нэгжүүдтэй зөвшилцсөний үндсэн дээр инфляцад үзүүлэх нөлөөллийг багасгах зорилгоор үнийг үе шаттайгаар, бага хэмжээгээр буюу 300 төгрөгөөр нэмэгдүүлэхээр тогтлоо. Энэхүү зохицуулалт нь шатахууны хомсдол үүсэхээс сэргийлэх, нийлүүлэлтийн тогтвортой байдлыг хангахад чиглэж байна.

Хаврын тариалалтын ажил эхэлж байгаатай холбогдуулан хөдөө аж ахуйн салбарт дэмжлэг үзүүлэх шийдвэр гаргав. Тодруулбал, тариалалтад шаардлагатай 10 мянган тонн дизель түлшийг хуучин үнээр нь буюу нэмэгдэлгүйгээр нийлүүлэхээр импортлогч компаниудтай нийгмийн хариуцлагын хүрээнд тохиролцжээ. Ингэснээр гурил, талх болон бусад өргөн хэрэглээний хүнсний бүтээгдэхүүний үнэ өсөхөөс урьдчилан сэргийлж байгаа юм.

Евро-5 стандартын АИ-95 болон дизель түлшний үнэ зах зээлийн зарчмаар 300 төгрөгөөр нэмэгдэж байгаа бөгөөд энэ нь өнөөдрөөс хэрэгжиж эхэлнэ. Шатахууны жижиглэнгийн үнийг хэт барих нь бөөний үнээсээ хямд болох, улмаар нийлүүлэлт тасалдах эрсдэлийг дагуулдаг тул ийнхүү зах зээлийн горимд нь нийцүүлэн зохицуулж байгааг албаны эх сурвалж тайлбарлалаа. Мөн шатахууны үнийн өсөлтөөс шалтгаалж улсын төсөвт тодотгол хийх шаардлагагүй гэж үзэж байна.