🔴LIVE: Ж.Энхбаяр: Монгол Улсад шатахууны нийлүүлэлт тасрахгүй. АИ-92-оос бусад шатахууны үнэ зах зээлийн зарчмаар явна

Ойрх Дорнодын бүс нутагт үүсээд буй хямралт нөхцөл байдал, зэвсэгт мөргөлдөөнөөс үүдэн дэлхийн эдийн засагт нийлүүлэлтийн томоохон шок үүсэж эхэллээ. Энэхүү нөхцөл байдал нь Монгол Улсын үндэсний аюулгүй байдал, тэр дундаа эдийн засгийн бие даасан байдалд шууд болон шууд бусаар нөлөөлөх эрсдэлийг дагуулж байна. Засгийн газраас үүсэж болзошгүй эрсдэлийг хохирол багатай даван туулах, үндэсний сөрөн тэсвэрлэх чадавхыг бэхжүүлэх чиглэлээр авах хариу арга хэмжээний төлөвлөгөөг танилцууллаа.

Өнөөдрийн байдлаар дэлхийн зах зээл дээр газрын тосны үнэ хэлбэлзэж, байгалийн хийн үнэ хоёр дахин өсөөд байна. Ойрх Дорнодын бүс нутгаас БНХАУ-ын импортолдог газрын тос, метанол, бордооны түүхий эд болох хүхрийн нийлүүлэлт тасалдаж байгаа нь манай улсын барилга, хөдөө аж ахуйн салбарт импортоор дамжсан үнийн өсөлт авчрах эрсдэлтэй юм. Тухайлбал, газрын тосны үнэ баррель нь 110-130 ам.долларт хүрвэл манай улсын инфляц 13-17 хувьд хүрч өсөх тооцоолол гарчээ.

Шатахууны хангамжийн тухайд Засгийн газраас нөөц бүрдүүлэх арга хэмжээг эртнээс авсны үр дүнд өнөөдрийн байдлаар АИ-92 шатахуун 41 хоног, дизель түлш 28 хоног, онгоцны түлш 21 хоногийн нөөцтэй байна. АИ-92 шатахууны үнийг ирэх долдугаар сар хүртэл тогтвортой барих боломжтой байгаа бол дизель түлшний үнэ дэлхийн зах зээл дээрх Сингапурын биржийн үнийг дагаж хэлбэлзэх төлөвтэй байна. Аж ахуйн нэгжүүдийг алдагдалд оруулахгүй байх, нийлүүлэлтийн тасалдал үүсгэхгүй байх үүднээс үнийг тодорхой хэмжээнд индексжүүлэн өөрчлөх асуудлыг Шатахууны үнийн зөвлөлөөр хэлэлцэн шийдвэрлэхээр боллоо.

Засгийн газраас Ковидын үеийн хуультай ижил төстэй, хямралын үед шуурхай шийдвэр гаргах боломжийг олгох "Үндэсний сөрөн тэсвэрлэх чадавхыг бэхжүүлэх тусгай хууль"-ийн төслийг УИХ-д өргөн барихаар бэлтгэж байна. Энэхүү хууль батлагдсанаар төсвийн ерөнхийлөн захирагч нар хооронд хөрөнгө шилжүүлэх, стратегийн бараа бүтээгдэхүүний гааль, НӨАТ-ыг чөлөөлөх, төсвийн хэмнэлтийн онцгой горим тогтоох зэрэг зохицуулалтыг хурдтай хийх эрх зүйн орчин бүрдэх юм.

Цаашид эрчим хүчний хараат бус байдлыг хангах нь Монгол Улсын хөгжлийн гол тулгуур болохыг онцоллоо. 2025 он гэхэд манай улсын эрчим хүчний салбар одоогийн хүчин чадлаа бүрэн ашиглаж дуусах тул салбарын либералчлал хийх, тарифын шинэчлэл хийх, сэргээгдэх эрчим хүч болон атомын цахилгаан станцын төслүүдийг идэвхжүүлэх шаардлага тулгарч байна. Мөн хийн хоолойн төсөл, газрын тос боловсруулах үйлдвэр, зэс хайлах үйлдвэр зэрэг томоохон төслүүдийг эрчимжүүлж, эдийн засгийн дархлааг тогтоохоор төлөвлөж байна.

Хүнс, эмийн хангамжийн хувьд нөхцөл байдал харьцангуй тогтвортой байна. Дотоодын хүнсний үйлдвэрлэл сэргэж, стратегийн гол нэрийн бүтээгдэхүүний нөөц хангалттай байгаа төдийгүй эмийн нөөцийг нэг жилийн хэрэглээгээр бүрдүүлжээ. Засгийн газар гадаад орчны тодорхойгүй байдалд бэлэн байж, иргэдийн орлогыг хамгаалах, аж ахуйн нэгжүүдийн тогтвортой үйл ажиллагааг дэмжих чиглэлд бүх нөөц боломжоо дайчлан ажиллана гэж Эдийн засаг, хөгжлийн сайд Ж.Энхбаяр мэдэгдлээ.