НҮБ-ын Аюулгүйн Зөвлөл Ойрхи Дорнодын хямралыг зохицуулах асуудлаар хуралдаж байна
НҮБ-ын Аюулгүйн Зөвлөл Ойрхи Дорнодын нөхцөл байдал, тэр дундаа Палестины асуудлаар нээлттэй болон хаалттай зөвлөлдөх уулзалт хийж байна.
Энэхүү хуралдаан нь АНУ, Израиль болон Ираны хооронд үүссэн зэвсэгт мөргөлдөөн бүс нутгийн хэмжээнд хурцадсан эгзэгтэй үед тохиож байгаа бөгөөд олон улсын хамтын нийгэмлэг хүмүүнлэгийн гамшгийг зогсоох, тогтвортой байдлыг эргүүлэн авчрах арга замыг эрэлхийлж байна.
НҮБ-ын Ойрхи Дорнодын энхийн үйл явцын зохицуулагчийн орлогч Рамиз Алакбаров Израилийн суурьшлын бүс байгуулах үйл ажиллагааг зогсоох тухай 2334 дүгээр тогтоолын хэрэгжилтийн талаар илтгэл танилцууллаа. Тэрээр Баруун эрэгт хүчирхийлэл эрс нэмэгдэж, энэ оны эхний гурван сарын байдлаар 26 палестин иргэн амиа алдаж, суурьшигчдын халдлагаас үүдэлтэй гэмтэл бэртэл 2024 онтой харьцуулахад бараг 100 хувиар өссөнийг онцлов.
Газын зурвасын асуудал хариуцсан "Энх тайвны зөвлөл"-ийн дээд төлөөлөгч Николай Младенов Газын мөргөлдөөнийг зогсоох иж бүрэн төлөвлөгөө болох 2803 дугаар тогтоолын хэрэгжилтийг танилцуулсан юм. Тэрээр Газын зурваст засаглалын шилжилтийн үүргийг гүйцэтгэж буй "Энх тайвны зөвлөл"-ийн үйл ажиллагаа болон тус бүс нутагт тогтвортой засаглал тогтоох хүчин чармайлтын талаар мэдээлэл өглөө.
Бүс нутгийн хэмжээнд нөхцөл байдал хүндэрч байгаатай холбогдуулан Ливанд дүрвэсэн нэг сая хүнд тусламж үзүүлэхэд зориулж 308.3 сая ам.долларын яаралтай тусламжийн уриалга гаргаад байна. Мөн Сири улсад Ливанаас агаарын цохилтоос дайжсан 140,000 орчим хүн нэвтэрсэн нь тус улсын сэргээн босголтын үйл явцад саад учруулж байгааг Аюулгүйн Зөвлөлийн гишүүдэд анхаарууллаа.
Дипломат хүрээнийхэн Газын зурваст Хамас бүлэглэлийг зэвсгээс ангижруулж, Палестины засаг захиргааг удирдах үүрэгт нь эргүүлэн оруулахыг уриалж байна. Европын 13 улс болон Канад улс Баруун эрэг дэх суурьшигчдын хүчирхийллийг эрс буруушааж байгаа бөгөөд энэ нь бүс нургийн тогтворгүй байдлын гол шалтгаан болж байна гэж үзэж байна.
Аюулгүйн Зөвлөлийн гишүүн орнууд Ойрхи Дорнодын хямралыг улс төрийн аргаар шийдвэрлэх, хоёр улсын шийдэлд хүрэх үйл явцыг яаралтай эхлүүлэх шаардлагатайг сануулж байна. Цаашид бүс нутгийн хэмжээний дайныг зогсоох, хүмүүнлэгийн тусламжийг саадгүй хүргэх асуудал олон улсын анхаарлын төвд байх болно.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.