🔴LIVE: Зэс эрдэнийн хувь ХК-ийн хувьцаа эзэмшигчид Э.Бат-Амгалан сайдыг огцрохыг шаардан тайван жагсаал хийж байна
"Зэс Эрдэнийн хувь" ХК-ийн хувьцаа эзэмшигчид УИХ-ын гишүүн, сайд Э.Бат-Амгаланг эсэргүүцэн жагсаал хийж байна. Тэдний жагсаалыг үймээн самуун болгох зорилготой хүмүүсийг турхирсан үйлдэл гарчээ. Төрийн өндөр албан тушаалтан ийм ёс зүйгүй үйлдэл гаргаж байгаад харамсаж буйгаа иргэдийн зүгээс илэрхийлэв.
"Зэс Эрдэнийн хувь" ХК-ийн үйлдвэрийн үйл ажиллагаа сүүлийн нэг жил хагасын хугацаанд саатаж, шүүхийн захирамжаар лацаджээ. Үүний улмаас 1.8 мянган тонн зэсийн асуудал гацаанд орсон бөгөөд Орхон аймгийн хууль хяналтын байгууллага, цагдаагийн алба хаагчид Л.Батбаяр захирал болон Э.Бат-Амгалан сайдын талд үйлчилж байна гэж жагсагчид үзэж байгаа юм.
Хувьцаа эзэмшигчдийн төлөөлөл хэлэхдээ, "Бид бол энэ компанийн жинхэнэ эзэд. Гэтэл шүүх, цагдаагийн байгууллага эздээс нь ямар ч тайлбар авалгүйгээр үйлдвэрийг шууд лацадсан нь байж боломгүй үйлдэл. Биднийг хөлсний хүмүүс гэж нэрлэж байгаа ч бид язгуур үнэний төлөө явж байна. Цаашид 600 гаруй хувьцаа эзэмшигч бидэнтэй нэгдэж, тэмцлээ улам өргөжүүлнэ" гэлээ.
Түүнчлэн Авлигатай тэмцэх газарт (АТГ) гаргасан гомдол нь өнөөдрийг хүртэл шийдэгдэхгүй, тодорхой хариу өгөхгүй байгааг тэд шүүмжлэв. АТГ-аас асуудлыг тодруулахаар удаа дараа хандсан боловч ямар нэгэн ахиц гараагүй байгааг хэллээ.
Жагсагчид төрийн гурван өндөрлөгт хандан иргэдийнхээ язгуур эрх ашгийг хамгаалж, энэхүү асуудалд анхаарал хандуулахыг хүслээ. Тэд өөрсдийнхөө хохирлыг барагдуулах хүртэл тууштай тэмцэхээ мэдэгдээд байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.