🔴С.Шаарийбуу: Малайзын төр буруутай гэдгийг тогтоолгох нь хэргийн гол зангилаа болоод байна

Иргэн С.Шаарийбуу олон жил гацаад буй охиныхоо хэргийн асуудлаар Ерөнхий сайдад ажлын хэсэг байгуулах хүсэлт гаргажээ. Ерөнхий сайд уг хүсэлтийг хүлээн авч, холбогдох албаныханд ажлын хэсгийг яаралтай байгуулж, хэргийг түргэн шалгуулах үүрэг өгсөн байна.

Шинээр байгуулагдсан ажлын хэсэг нь 10 гаруй хүний бүрэлдэхүүнтэй бөгөөд үүнд Хууль зүй, дотоод хэргийн яам болон Гадаад харилцааны яамны Төрийн нарийн бичгийн дарга нар, Консулын газрын дарга, Хүний эрхийн үндэсний комиссын гишүүн болон мэргэжлийн хуульчид багтжээ. Уг комиссыг Ш.Раднаасэд ахлан ажиллаж байгаа бөгөөд хохирогчийн талын тавьж буй саналыг сонсож, цаашид хэрхэн ажиллах талаар хэлэлцсэн байна.

Энэхүү хэрэг нь зөвхөн хувь хүний асуудал биш, Монгол, Малайз, Австрали гэсэн гурван улсын хоорондын эрх зүйн ээдрээтэй нөхцөл байдлаас шалтгаалан олон жил шийдэгдэхгүй гацаад байгаа юм. Хэрэг үйлдсэн этгээдүүдийн нэг нь Австралид чөлөөтэй амьдарч байгаа бол нөгөө нь Малайзын шоронд ял эдэлж байна. Австралийн Засгийн газар цаазын ялтай хүнийг шилжүүлэн өгөхгүй гэх байр суурь баримталдаг бол Малайзын тал уг этгээдийн цаазын ялыг биеэр эдлэх ял болгон өөрчлөх тал дээр улс төрийн болон бусад ашиг сонирхлын улмаас хойрго хандаж иржээ.

С.Шаарийбуугийн хэлж буйгаар, уг хэрэг нь 2006 онд Малайзын тухайн үеийн төрийн өндөр албан тушаалтнуудын даалгавраар үйлдэгдсэн "төрийн захиалгат" ажил байсан гэж үзэж байна. Тухайн үеийн Ерөнхий сайд, түүний улс төрийн зөвлөх болон Батлан хамгаалах яамны өндөр албан тушаалтнууд энэ хэрэгт шууд болон шууд бусаар холбогдсон байдаг. Тиймээс төр буруутай гэдгийг тогтоолгох нь хэргийн гол зангилаа болоод байгаа аж.

Малайзын экс Ерөнхий сайд өдгөө улсынхаа баялгийн санг хувьдаа завшиж, авлига авсан хэргээр шоронд хоригдож байгааг тэрбээр дурдлаа. Монгол Улсын төр энэ асуудалд анхаарал хандуулж, Австрали болон Малайз улстай төрийн хэмжээнд яриа хэлэлцээ хийж эхэлсэн нь хэргийг шийдвэрлэхэд томоохон түлхэц болно гэж найдаж байна. Хохирогчийн тал манай улс энэ асуудалд илүү даацтай, хүчтэй байр сууринаас хандах цаг болсныг онцлов.