🔴Зэс эрдэнийн хувь ХК-ийн хувьцаа эзэмшигч, хохирсон иргэд eс дэх өдрөө тайвнаар жагсаж байна

"Зэс эрдэнийн хувь" ХК-ийн хувьцаа эзэмшигчид санхүүгийн луйвар, хууль бус гэрээг эсэргүүцэн Төрийн ордны гадна ес дэх хоногтоо тайван жагсаал хийж байна. Жагсагчдын зүгээс холбогдох албан тушаалтнуудад шаардлага хүргүүлээд багагүй хугацаа өнгөрсөн ч одоогоор ямар нэгэн тодорхой хариу ирүүлээгүй байгааг мэдэгдлээ.

Жагсагчид "Зэс эрдэнийн хувь" ХК-ийн үйл ажиллагаанд санхүүгийн ноцтой залилан нүүрлэсэн гэж үзэж байна. Тэдний хэлж буйгаар, хөрөнгө оруулалтын нэрээр өндөр хүүтэй зээл шахах, шатахуун болон бусад бараа материалыг зах зээлийн ханшаас дээгүүр үнээр нийлүүлэх зэргээр компанийг өрийн дарамтад оруулсан байна. Энэхүү нөхцөл байдлыг тэд Оюутолгойн гэрээний жижгэрүүлсэн хувилбар буюу "санхүүгийн луйвар" хэмээн тодорхойлж, хууль хяналтын байгууллагыг үүнийг анхааралдаа авахыг хүслээ.

Тэмцэгчид үйлдвэрийн үйл ажиллагааг сэргээж, төрд 34 хувийг эзэмшүүлэн, иргэдэд ногдол ашиг хүртээх замаар асуудлыг шийдвэрлэх боломжтой гэж үзэж байна. Тэд өөрсдийн шаардлагаа 7000 гаруй иргэний гарын үсгийн хамт Төрийн гурван өндөрлөг болон Авлигатай тэмцэх газарт (АТГ) хүргүүлсэн ч одоогоор албан ёсны хариу ирээгүй байгаа аж.

Жагсаалын үеэр зарим хувьцаа эзэмшигчид болон хамтран тэмцэж байсан нөхөд нь эсрэг талд худалдагдсан гэх харамсалтай мэдээллийг өгч байв. Тэд "Энхтайваны Батбаяр, Батамгалан нарын талд орж, ард иргэдийнхээ эсрэг мэдээлэл хийж байгаа хүмүүсийг ноён нуруутай байж, үнэн талд зогсохыг" уриаллаа. Хэрэв энэ хэвээр үргэлжилбэл иргэд болон төр засаг 2032 он хүртэл ямар ч ногдол ашиг хүртэж чадахгүй нөхцөл байдал үүсээд байгааг тэд анхааруулав.

Жагсагчид хууль бус гэрээнүүдийг цуцалж, холбогдох албан тушаалтнуудтай биечлэн уулзах хүртэл тэмцлээ зогсоохгүй гэдгээ илэрхийллээ. Одоогоор жагсаал хууль журмын дагуу, тайван замаар үргэлжилж байна.