🔴Б.Батбаатар: Ардчилсан намынхан улс төрийн зорилготой "тоглолт" хийж байна

УИХ-ын дарга Н.Учралыг "спикер"-ын албан тушаалаа өгөх хүртэл УИХ дахь АН-ын бүлэг чуулганы хуралдаанд суухгүй гэх байр суурьтай байгаа билээ. 

Уг асуудлыг ИЗНН-ын дарга, УИХ-ын гишүүн Б.Батбаатар чуулганы ирц бүрдүүлэхгүй байгааг цэвэр улс төрийн зорилготой "тоглолт" хэмээн үзэж байна.

УИХ-ын гишүүн Б.Батбаатар:

-УИХ-ын даргыг томилох үед дэмжиж саналаа өгчихөөд, удалгүй огцрох шаардлага тавих нь парламентын тогтвортой байдалд сөргөөр нөлөөлнө. Түүнчлэн, парламентын дарга нам бус байх тухай асуудал 20 жилийн өмнө Ц.Нямдорж даргын үед ч яригдаж байсан бөгөөд энэ нь цаашид ч хэлэлцэгдэх сэдэв мөн боловч одоогийн нөхцөлд үүнийг шалтаг болгон төрийн ажлыг гацаах нь зохимжгүй. Парламентад суудалтай намууд зөвшилцөж, улс төрийн соёлын хүрээнд зарчмаа тогтох нь чухал.

Парламентад олонх болж, Засгийн газрыг бүрдүүлсэн МАН-ын хувьд ирц бүрдүүлэх, төрийн ажлыг тасралтгүй явуулах нь тэдний нэгдүгээр зэргийн үүрэг юм. Хэрэв Засгийн газар мөрийн хөтөлбөрөө биелүүлж чадахгүй бол олонх өөрсдөө хариуцлага тооцох ёстой. Харин сөрөг хүчний хувьд аливаа асуудалд шүүмжлэлтэй хандаж, "хөшигний ардах" хууль бус үйлдлүүдийг ил гарган, илүү сайн алтернатив хувилбаруудыг санал болгож ажиллах нь зүйтэй гэж үзэж байна.

ИЗНН-ын дотоод зөрчлийн тухайд, намын удирдлагыг хууль бусаар авах гэсэн оролдлого нь гадны захиалгатай, тодорхой "найруулагчтай" жүжиг хэмээн тайлбарлав. Бусдын нэрийг барих, гарын үсэг хуурамчаар үйлдэх зэрэг хууль бус үйлдлүүд гарч байгаа бөгөөд үүний цаана санхүүжүүлэгч эзэд байгааг тогтоосон ч одоогоор нэрлэх боломжгүй байгааг дурдлаа. Энэхүү үйл ажиллагаа нь парламентад суудал бүхий намын эрх мэдэл рүү халдаж буй хэрэг гэж үзэж байна.