🔴LIVE: БЗД-ийн Ардчилсан намын гишүүд УИХ-ын гишүүн, БХБОС-ын сайд Э.Бат-Амгаланг АТГ-д шалгуулах бичиг өгч байна

Баянзүрх дүүргийн Иргэдийн Төлөөлөгчдийн Хурал (ИТХ) дахь Ардчилсан намын бүлгийн төлөөлөгчид тус дүүргийн төсвийн хөрөнгөөр төрийн албан хаагчдад орон сууцны дэмжлэг үзүүлсэн асуудлыг шалгуулахаар Авлигатай тэмцэх газарт (АТГ) албан ёсоор хандлаа. Тэд дүүргийн төсвөөс 20-30 сая төгрөгийн дэмжлэгийг тодорхой албан тушаалтнуудад олгож, улмаар уг хөрөнгийг УИХ-ын гишүүний хамаарал бүхий компани руу шилжүүлсэн байж болзошгүй гэж үзэж байна.

Энэхүү асуудал нь Хотын дарга Х.Нямбаатарын хийсэн мэдээллээс үүдэлтэй бөгөөд тэрээр Баянзүрх дүүргийн төсвөөс төрийн албан хаагчдад орон сууцны урьдчилгаа болгон мөнгө олгож, тэр нь УИХ-ын гишүүн Э.Бат-Амгалангийн хамаарал бүхий "Оптто" компани руу шилжсэн талаар дурдсан юм. Үүнтэй холбогдуулан иргэний нийгмийн идэвхтнүүд ч мөн ахлах нягтлан бодогч болон Төрийн сангийн хэлтсийн дарга зэрэг хүмүүс орон сууцтай атлаа ийм дэмжлэг авсан байж болзошгүй баримтуудыг дэлгээд байгаа билээ.

Төлөөлөгчдийн зүгээс төсвийн хөрөнгө буюу татвар төлөгчдийн мөнгийг үр дүнгүй зарцуулсан, Авлигын эсрэг хууль зөрчиж хэн нэгэнд давуу байдал олгосон эсэхийг тогтоолгохоор ийнхүү бичгээр гомдол гаргаж байна. Тэдний хэлж буйгаар, 20-30 сая төгрөгийн дэмжлэгүүдийг нэгтгэвэл 1 тэрбум орчим төгрөгийн асуудал яригдаж байгаа бөгөөд үүнийг хууль ёсны дагуу шийдвэрлэсэн эсэхийг шалгах зайлшгүй шаардлагатай аж.

Мөн Баянзүрх дүүргийн Ахмадын хороо руу 850 сая төгрөг шилжүүлж, бэлэг сэлт тараасан гэх асуудал нь төсвийн сахилга бат алдагдсаны ноцтой илрэл гэж үзэж байна. Дүүргийн ИТХ-д сөрөг хүчний хяналт сул байгааг ашиглан төсвийн мөнгийг ашиг сонирхлын зөрчилтэй байдлаар зарцуулж байгааг төлөөлөгчид шүүмжлэв.

Баянзүрх дүүрэг нь 500 мянга орчим хүн амтай, нийслэлийн хамгийн том дүүргүүдийн нэг тул төсвийн зарцуулалт ил тод, шударга байх ёстойг тэд онцоллоо. АТГ-т гаргасан гомдлын дагуу шалгалтын ажиллагаа хэрхэн явагдах, ямар үр дүн гарах талаар эргэж мэдээлэх бөгөөд энэхүү асуудлыг эцсийг нь хүртэл хяналтдаа байлгахаа мэдэгдсэн юм.