🔴Х.Нямбаатар: Миний зураг хөрөг шатаагаад явбал явахаас биш. Надад хэрүүл тэмцэл хийх зав алга

Нийслэлийн түгжрэлийг бууруулах зорилгоор "Туулын хурдны зам"-ын бүтээн байгуулалтын ажил эхлээд байна. Нийт 33 км үргэлжлэх тус зам нь зургаан эгнээтэй, зургаан орц гарцтай байх бөгөөд үүнээс 10 гаруй км нь 20-30 метрийн өндөр гүүрэн байгууламжаар явах юм. Энэхүү төсөл нь Монгол Улсад анх удаа хэрэгжиж буй өндөр түвшний инженерийн шийдэл бүхий ажил бөгөөд зарим хэсэгтээ 40-50 метрийн өндөр тулгууртай гүүр баригдахаар төлөвлөгджээ.

Төслийн зөвлөх үйлчилгээг олон улсын "PMC" компани гүйцэтгэж, "Чайна Констракшн" компани концепт дизайн болон ТЭЗҮ-ийг боловсруулсан байна. Авто замын хөгжлийн төвөөс магадлал хийж, EPC нөхцөлөөр гүйцэтгэгчийг шалгаруулсан бөгөөд ирэх оны долоодугаар сарын 1-н гэхэд эхний зорчих хэсгийг нээхээр төлөвлөж байна. Тус зам ашиглалтад орсноор нийслэлийн авто замын түгжрэл 30 гаруй хувиар буурна гэж тооцоолжээ.

Байгаль орчны нөлөөллийн нарийвчилсан үнэлгээгээр замын трасс нь голын хойд талын даланг дагаж, Туулын бургасанд бага нөлөө үзүүлэхээр тусгагдсан байна. Шүүмжлэл дагуулаад буй өртөг зардлын тухайд, энэхүү зам нь Дарханы замаас илүү хүнд хийцлэлтэй, хотын төв хэсгээр дандаа гүүрэн байгууламжаар явах тул өндөр өртөгтэй байх нь зайлшгүй гэдгийг албаныхан тайлбарлалаа.

Улс төрийн нөхцөл байдлын тухайд, Ерөнхий сайд холбогдох албан тушаалтнуудтай уулзаж, нийгмийн сүлжээн дэх маргааныг зогсоох чиглэл өгсөн байна. Нийслэлийн МАН-ын хорооны даргыг солих асуудал яригдаагүй бөгөөд одоогоор ТЭЦ-5, Дамбадаржаагийн дулааны станц, Хүннүгийн 90МВт-ын станц, тойрог хурдны зам болон трамвай зэрэг томоохон төслүүдийн ажил эхлэх шатандаа явж байна. Мөн Сэлбэ дэд төвийн орон сууцны эхний ээлжийг ирэх жилийн наадмаар ашиглалтад оруулахаар ажиллаж байна.

Түүнчлэн дулаан зогсоолуудад ТҮЦ ажиллаж байгаа асуудалд иргэд шүүмжлэлтэй хандаж байна. Өнгөрсөн хугацаанд хотын иргэдийн шаардлагаар 1000 гаруй ТҮЦ-ийг нүүлгэн шилжүүлсэн ч зарим байршилд ТҮЦ эрхлэгчдийн шахалтаар үйлчилгээ явуулсаар байгаа аж. Цаашид дулаан зогсоолуудыг зориулалтын дагуу иргэдэд нээлттэй байлгахад анхаарч ажиллахаа илэрхийллээ.