🔴О.Саранчулуун: Шүүх засаглалд итгэх иргэдийн итгэл сул байгаа үeд парламeнтын гишүүдийг эгүүлэн татах асуудалд болгоомжтой хандах ёстой

УИХ-ын гишүүдэд ёс зүйн хариуцлага хүлээлгэх, улмаар эргүүлэн татах тухай хуулийн төсөл олны анхаарлыг татаж байна. Гишүүд хариуцлагатай, ёс зүйтэй байх ёстойг нийгмээрээ шаардаж буй энэ үед хууль тогтоогчдын зүгээс уг асуудалд нухацтай хандах шаардлагатайг онцолж байна. Хэдийгээр иргэдийн бухимдал, аргаа барсан үйлдлийг ойлгож байгаа ч хуулийн зохицуулалт нь амьдралд нийцтэй, суурь зарчимдаа үнэнч байх ёстой гэж үзэж байна.

Ёс зүйн зөрчлийг хуулиар хэрхэн зааглах вэ гэдэг нь хамгийн том асуудал юм. Аль хэсгийг нь хуульчлан шийдэж, аль хэсгийг нь иргэдийн ухамсар, сонголтод үлдээх вэ гэдгийг тодорхой болгохгүйгээр шууд "эргүүлэн татах" тухай ярих нь эрсдэлтэй. Ялангуяа шүүх засаглалд итгэх иргэдийн итгэл хангалтгүй байгаа өнөөгийн нөхцөлд хэн ёс зүйн шүүгч байх вэ гэдэг асуулт гарч ирнэ. Хэрэв тогтолцоо нь өөрөө бат найдвартай биш бол энэ нь эргээд улс төрийн өрсөлдөгчөө замаасаа зайлуулах хэрэгсэл болох аюултайг олон улсын туршлага харуулдаг хэмээн УИХ-ын гишүүн О.Саранчулуун байр сууриа илэрхийллээ.