🔴Гeнeрал Х.Лхагвасүрэн: Монгол улс хөгжиж байгаа ч бид үргэлж мууг амлаж, бусдыг шүтэж, өөрсдийгөө доош нь хийдэг зангаасаа салах хэрэгтэй

Монгол Улсын Ерөнхийлөгчийн ивээл дор зохион байгуулж буй “Монгол эр хүн” үндэсний III чуулган Төрийн ордонд болж байна.

Өнөөдөр дэлхий дээр хүлээн зөвшөөрөгдсөн 193 улс орон оршин тогтнож байна. Эдгээр улс орнуудын иргэдийг эх оронтой болон эх оронгүй ард түмэн гэж хоёр хувааж үзэж болохоор нөхцөл байдал үүсжээ. Харин монголчууд бид дэлгэр сайхан эх орондоо эрх чөлөөтэй, үзэл бодлоо чөлөөтэй илэрхийлж, дураараа амьдарч байгаа нь дэндүү их хувь заяа, аз жаргал юм.

Бидний мах цусны тасархай болох Өвөр Монгол, Буриад, Халимаг, Тувагийн ард түмэн өнөөдөр бусдын хууль дүрэмд захирагдаж, ёс заншил, эх хэлээ алдахад хүрээд байна. Тэдний хувьд "Би монгол хүн" гэх дууг гунигтайгаар аялахаас цаашгүй, эх орон гэдэг үгийн жинхэнэ утгыг зүрх сэтгэлдээ тээж яваа ч бодит байдал дээр харь гүрний иргэн болон амьдарч байна. Тэдний дэргэд тусгаар тогтносон улстай бид толгой дээгүүр, тохой өндөр алхах бүрэн эрхтэй.

Соёлын гавьяат зүтгэлтэн Ж.Бадраа гуайн шүлэгт "Элэг зүрхнээс уяатай, энхрий Монгол орон" хэмээн өгүүлдэг. Эх орон гэдэг бол хүний сэтгэл зүрхэнд уяатай байдаг нандин зүйл юм. Хүн эх орноосоо гараад явахад дотор нь хоосон оргиж, харин эргээд ирэхэд тэрхүү орон зай дүүрдэг нь эх орны үнэ цэнийг илтгэх хамгийн том мэдрэмж билээ. Дэлхийгээр тархсан элэг нэгтнүүд маань гэдэс цатгалан байж болох ч сэтгэл нь үргэлж эх орноо гэсэн дутуу орон зайтай явдаг нь нууц биш.

Өнөөдөр бид эх орноо хөгжүүлэхэд анхаарах цаг болжээ. Монгол улс хөгжиж байгаа ч бид үргэлж мууг амлаж, бусдыг шүтэж, өөрсдийгөө доош нь хийдэг зангаасаа салах хэрэгтэй.

Технологийн хөгжлийг дагаад мэдээлэл хурдтай тархаж байгаа ч сошиал орчинд бие биенээ үгүйсгэх, дэлхий нийтийн зөрчил мөргөлдөөнийг талцан дэмжих нь байж боломгүй үйлдэл юм. Төр засгаас дайныг зогсоох байр суурь илэрхийлж байхад иргэд хоорондоо хэрэлдэж, талцах нь үндэсний эв нэгдэлд харш билээ.

Эх орны үнэ цэнийг хилийн цэрэгт алба хааж буй залуус хамгийн сайн мэдэрдэг. 18 настай залуус хил дээр очоод хэдхэн хоногийн дараа л "Энэ миний эх орон, миний өмч юм байна" гэдгийг ухаарч эхэлдэг. Хилийн алба хаасан залуус нутаг буцахдаа уйлж, эргээд хилээ дурсдаг нь эх оронч үзлийн тод жишээ юм. Түүнчлэн орон нутгийн залуусыг тухайн бүс нутгийнх нь хил дээр алба хаалгах нь малын хулгай, хил орчмын зөрчлийг бууруулахад бодит үр дүн үзүүлдэг туршлага бий.

Одоогийн залуучуудыг нийгэм, технологийн хурдацтай хөгжил дунд өсөж байгааг буруутгах аргагүй. Гэвч тэдний язгуур шинж чанарт монгол хүний гүндүүгүй зан, жудаг, эр хүний ноён нуруу байсаар байгаа юм. Гаднаас нь хараад дүгнэх бус, тэдний дотор орших монгол хүний мөн чанарт итгэх хэрэгтэй. Бид эх орноо хайрлаж, өөдрөгөөр харж чадвал хөгжингүй нийгмийг цогцлоох бүрэн боломжтой.