🔴Монгол Улсын аварга С.Мөнхбат: "Эр хүн уйлдаггүй" гэх ойлголт нь гоншигнохгүй, худал хэлэхгүй, хариуцлагатай байхыг сургаж ирсэн

Монгол Улсын Ерөнхийлөгчийн ивээл дор зохион байгуулж буй “Монгол эр хүн” үндэсний III чуулган Төрийн ордонд болж байна.

Өнөөдрийн нийгэмд аавуудын оролцоо, тэдний гүйцэтгэх үүрэг хамгийн чухал асуудлын нэг болоод байна. Аав хүн зөвхөн гэр бүлийнхээ хүрээнд бус, улс орныхоо ирээдүйн нийгмийг бүтээхэд томоохон хувь нэмэр оруулах учиртай. Хэдийгээр өнөөдөр өөрийн гэр бүлдээ бүхнээ зориулж байгаа ч, ирээдүйн хүргэн, бэрүүдээ бэлтгэж буйгаа ухамсарлаж, илүү алсын хараатай байхыг Монгол Улсын аварга С.Мөнхбат уриалж байна.

Орчин үеийн залуусын дунд эршүүд чанар алдагдаж, илүү танхил, эмэгтэйлэг болох хандлага ажиглагдаж байгааг мэргэжилтнүүд шүүмжлэх болсон. Энэ нь байгалийн хуулиар хүчирхэг эр хүнийг түшихийг хүсдэг эмэгтэйчүүдийн хүлээлттэй зөрчилдөж байгаа юм. Байгаль дэлхий дээр хүчирхэг эр хүйстэн байж гэмээнэ тухайн төрөл зүйл хүчирхэг үлддэгтэй адил, нийгэмд сул дорой эрчүүд олшрох нь улс орны хөгжилд сөрөг үр дагавартай гэж үзэж байна.

Технологийн дэвшил болон хотжилттой холбоотойгоор биеийн хүчний ажил багассан нь эрчүүдийн бялдар, тэсвэр хатуужилд нөлөөлж байна. Японы жишээнээс харахад сул дорой эрчүүд олшрох нь эдийн засгийн өсөлт болон нийгмийн харилцаанд олон сөрөг асуудлыг дагуулж байгааг харж болно. Монголчуудын хувьд нүүдэлчин соёлын ачаар эршүүд чанар харьцангуй хадгалагдаж байгаа ч, Улаанбаатар хотын төвлөрөл дунд энэ чанарыг хэрхэн авч үлдэх вэ гэдэгт төр засаг болон олон нийт анхаарах цаг болжээ.

Боловсролын системд зөвхөн мэдлэг олгохоос гадна бие бялдар, сэтгэл зүйн хатуужил олгох тал дээр шинэчлэл хийх шаардлагатай байна. Биеийн тамирын хичээлийн агуулгыг өөрчилж, эрүүл, өв тэгш иргэнийг бэлтгэх нь чухал юм. Мөн эцэг эхчүүд хүүхдээ хайрлах нэрээр хэт бөөцийлөх бус, эрсдэлийг даван туулах чадвартай, хатуужилтай хүн болгож төлөвшүүлэхэд анхаарах хэрэгтэй. "Эр хүн уйлдаггүй" гэх ойлголт нь гоншигнохгүй, худал хэлэхгүй, хариуцлагатай байхыг сургаж ирсэн уламжлалт хүмүүжлийн нэг хэлбэр байсан юм.

Удахгүй болох "Эр цэргийн баяр"-ыг тохиолдуулан эрчүүддээ хандаж архинаас татгалзахыг уриалж байна. Баяр ёслолыг архидалт, наргиан цэнгээн болгож өнгөрүүлэх биш, гэр бүлээрээ цуглаж эрчүүдийн өмнө тулгамдаж буй асуудлыг хэлэлцдэг, бүтээлч ирээдүй рүү зорьсон өдөр болгон тэмдэглэдэг болох нь зүйтэй. Эр хүн шиг байх, эр хүнд байх ёстой эрхэм чанаруудаа таньж мэдэхэд энэ өдрийг зарцуулахыг нийт эрчүүддээ уриаллаа.