🔴Л.Энх-Амгалан: Боловсролын сайд болох санал тавибал бодож үзнэ

УИХ-ын гишүүн Л.Энх-Амгалан одоогоор Боловсролын сайдаар томилогдох албан ёсны санал хүлээж аваагүй байгаагаа дурдаад, салбарын хэмжээнд хариуцлагын асуудал яригдах ёстойг онцлов.

УИХ-ын гишүүн Л.Энх-Амгалан: 

-Хоёр жилийн өмнө Боловсролын багц хуулийг иж бүрнээр нь батлуулж, мэргэжлийн боловсролын тогтолцоог тус яаманд нэгтгэснээр эрх зүйн томоохон шинэчлэлийн суурийг тавьсан. Үүний үр дүнд салбарын санхүүжилт 1.7 их наядаас 4.2 их наяд төгрөг болж нэмэгдсэн бөгөөд "Хамгийн сайн сургууль бол гэрт ойрхон сургууль" гэх үзэл баримтлалын хүрээнд зургаан том реформыг эхлүүлээд байсан. 

Гэвч сүүлийн үед эдгээр шинэчлэлийн ажил үндсэндээ "царцсан" байдалд орсон. Тухайлбал, хөтөлбөрийн шинэчлэл, багшийн гурван тулгуурт бодлого, гүйцэтгэлд суурилсан санхүүжилт болон цахим шинэчлэлийн ажлууд эрчээ алдсан байна. Мөн багш нарын цалинг нэмэхээр УИХ-аас 720 тэрбум төгрөг төсөвлөсөн ч хэрэгжилтийн шатанд бодлогын ноцтой алдаанууд гарсан гэж үзэж байна.

Сайдын томилгооны тухайд, Үндсэн хуулийн дагуу Засгийн газрын гишүүнийг томилох, чөлөөлөх нь Ерөнхий сайдын бүрэн эрхийн асуудал. Гэсэн хэдий ч өөрийнх нь эхлүүлсэн томоохон реформууд доголдож байгаад сэтгэл зовниж байгаа.

Боловсролын салбарын шинэчлэл бол зөвхөн нэг хүний ажил биш, Монгол Улсын ирээдүй болсон 1.3 сая хүүхдийн эрх ашиг, улс орны хувь заяаны асуудал тул эхлүүлсэн ажлаасаа ухрах ёсгүй.