🔴С.Бямбацогт: Дараагийн Эрчим хүч, Боловсролын сайд нарын нэрс тодорхойгүй байна

Боловсролын сайд П.Наранбаяр, Эрчим хүчний сайд Б.Чойжилсүрэн нар үүрэгт ажлаасаа чөлөөлөгдөх хүсэлтээ гаргаад буй. Ерөнхий сайд өөрт олгогдсон бүрэн эрхийн хүрээнд дараагийн сайд нарын асуудлыг цаг алдалгүй оруулж ирэх хүлээлттэй байна. Засгийн газрын тухай хуулийн дагуу шинэ сайд нарыг томилохдоо Ерөнхийлөгч болон УИХ-д танилцуулах бөгөөд энэхүү процесс энэ долоо хоногт багтан явагдах төлөвтэй байна. Мөн хамтарсан засгийн газрын түнш ХҮН нам болон МАН-ын Удирдах зөвлөл, бүлгийн хурлаар зөвшилцсөний үндсэн дээр дараагийн томилгоог эцэслэн шийдвэрлэх юм.

АН-ын бүлгийн зүгээс "МАН-ын дарга УИХ-ын дарга байж болохгүй" гэсэн шаардлага тавьж, чуулганы үйл ажиллагаанд оролцохгүй байгаа асуудалд МАН-ын бүлэг байр сууриа илэрхийллээ. Өмнөх парламентын түүхэнд УИХ-ын дарга намын дарга байсан тохиолдлууд олон байсан бөгөөд энэ нь төрийн ажил гацах үндэслэл болохгүй гэж үзэж байна. Үүнийг АН-ын зүгээс ажлаа хийхгүй байх "шалтаг" төдий зүйл хэмээн тодорхойлж, дотоод асуудлаа шийдвэрлэх цаг хожих эсвэл хаврын улс төрийн үйл ажиллагааг саатуулах зорилготой байж болзошгүй хэмээн ЗГХЭГ-ын дарга С.Бямбацогт онцлов.

МАН-ын бүлгийн хурлаар УИХ-ын тухай, Чуулганы хуралдааны дэгийн тухай болон Ёс зүй, хяналт шалгалтын тухай хуулиудад нэмэлт өөрчлөлт оруулах асуудлыг хэлэлцсэн байна. Өнгөрсөн хугацаанд хуулийн тодорхой зөрчил, хийдэл байгаа нь ажиглагдсан тул хаврын чуулганаас өмнө УИХ-ын үйл ажиллагааг чамбайруулж, гишүүдийн хариуцлагыг нэмэгдүүлэхээр төлөвлөж байна. Тухайлбал, ирцэд бүртгүүлчихээд хуралдаанд оролцдоггүй, санал хураалтаас зайлсхийдэг, ажлын хэсэгт нэрээ оруулсан ч хуралдаа суудаггүй гишүүдэд хариуцлага тооцох механизмыг тодорхой болгох юм.

Түүнчлэн хууль санаачлагчаар нэрээ бичүүлдэг ч бодит байдал дээр тухайн хуулийнхаа эсрэг байр суурь илэрхийлдэг хариуцлагагүй үйлдлийг таслан зогсоохоор ажлын хэсэг ажиллаж байна. Хэрэв гишүүн ажлын хэсэг болон байнгын хорооны хуралдаанд идэвхгүй оролцвол бүрэлдэхүүнээс гаргаж, оронд нь ажиллах сонирхолтой гишүүдийг томилдог болох зохицуулалтыг тусгахаар болжээ.

Баянзүрх дүүргийн асуудал болон зарим сайд нартай холбоотой санхүүгийн зөрчлийн талаарх мэдээлэлд Үндэсний аудитын газрын дүгнэлтийг хүлээх шаардлагатайг санууллаа. 2025 оны гүйцэтгэлийн аудитын тайлан УИХ-аар хэлэлцэгдэх үед санхүүгийн бодит зөрчил тогтоогдвол хариуцлагын асуудал яригдах бөгөөд гэмт хэргийн шинжтэй тохиолдолд хууль хяналтын байгууллага шалгах болно. Одоогоор хэвлэлээр гарч буй батлагдаагүй мэдээлэлд тулгуурлан дүгнэлт хийх нь зохимжгүй гэж үзэж байна.

Дэд сайдуудын орон тоог цомхотгох асуудлаар Засгийн газрын бүтэц, бүрэлдэхүүнийг илүү бүтээмжтэй болгох цогц шинэчлэлийн хүрээнд ажлын хэсэг ажиллаж байна. Одоогийн хуулиар дэд сайдтай байхаар заасан тул хуульд өөрчлөлт оруулж байж энэ асуудлыг шийдвэрлэх боломжтой. Төрийн байгууллагын чиг үүргийн давхцлыг арилгах, үрэлгэн зардлыг хэмнэх чиглэлээр сөрөг хүчинтэй хамтран ажиллах санал хүргүүлээд байгаа бөгөөд төрийн албаны шинэчлэлийг ил тод, шилэн болгох зорилт тавин ажиллаж байна.