Сайд Э.Бат-Амгалан БЗД-ийн төсвийн асуудлыг шалтаг болгон Хотын даргын эсрэг иргэдийг дайчлах чиглэл өгсөн гэв үү

Баянзүрх дүүргийн Иргэдийн Төлөөлөгчдийн хурал Хотын дарга Х.Нямбаатарт шаардлага хүргүүлэхээр НЗДТГ-ын гадаа жагсаал зохион байгуулжээ. Энэхүү маргаан нь 2026 оны гуравдугаар сарын 2-ны өдөр НИТХ-аас батлагдсан хотын төсвийн тодотголоор тус дүүргийн төвлөрүүлэх орлогыг 27 тэрбум төгрөгөөр нэмэгдүүлснээс үүдэлтэй юм. Дүүргийн удирдлагууд энэхүү шийдвэрийг 500 мянган оршин суугчийн эрх ашгийг зөрчсөн, үндэслэлгүй дарамт гэж үзжээ.

БЗД-ийн төсвийн маргааны цаана Хотын дарга Х.Нямбаатар болон Барилга, хот байгуулалтын сайд Э.Бат-Амгалан нарын хоорондын улс төрийн зөрчил гүнзгийрч байгааг ажиглагчид тэмдэглэжээ. Сайд Э.Бат-Амгалан гуравдугаар сарын 12-ны өдөр БЗД-ийн намын хорооны хурлыг яаралтай зарлаж, төсвийн асуудлыг шалтаг болгон Хотын даргын эсрэг иргэдийг дайчлах чиглэл өгсөн гэх мэдээлэл гараад байгаа юм. Энэ нь түүний эсрэг чиглэсэн бусад эсэргүүцлийн арга хэмжээнээс олон нийтийн анхаарлыг холдуулах гэсэн тактик байж болзошгүй гэж үзэж байна.

Учир нь “Зэс эрдэнийн хувь” ХК-ийн хувьцаа эзэмшигчид сайд Э.Бат-Амгаланг огцрохыг шаардаж, яамных нь гадна тав хоног жагсаж, өлсгөлөн зарлаад буй. Жагсагчид тус компанийн хөрөнгө оруулалт хариуцсан захирлаар ажиллаж байсан, сайд Э.Бат-Амгалангийн төрсөн дүү Э.Батбаярыг их хэмжээний мөнгө шамшигдуулсан хэрэгт буруутгаж, ахынхаа сонгуулийн ажлыг ивээн тэтгэсэн байж болзошгүй хэмээн үзэж байгаа юм. 

Хотын төсвийг хотын дарга дангаараа шийддэг мэтээр дайрч давшлах нь буруу. Төсвийн тодотгол, хуваарилалтыг эцсийн байдлаар баталдаг байгууллага нь НИТХ. Үүнийг мэдсээр байж дүүргийн төсвийн асуудлаа хотын даргад тохож буруутгах нь улс төрийн өнгө аястай, үндэслэл муутай шүүмжлэл гэдэг нь харагдаж байна. Хэрэв БЗД-ээс их хэмжээний төсөв авах шийдвэр гарсан бол энэ нь НИТХ-аар хэлэлцэж батлагдсан шийдвэр гэдгийг хэн ч ойлгох биз.